DA BERLINALE AO XURADO DO FICBUEU 27/08/2018

Especialistas con experiencia na Berlinale e outros reputados certames cinematográficos integrarán o xurado internacional do FICBUEU 2018. O director arxentino Alejo Franzetti, a xornalista neocelandesa Carmen Gray e o crítico Manu Yáñez  acudirán ao Festival Internacional de Curtametraxes de Bueu para avaliar as obras da sección principal. Un xurado nacional seleccionará aos premiados das seccións España e Galicia R, mentres que outro trío de expertos escollerá aos gañadores da Sección Escolas.

Alejo Franzetti é membro do comité de selección do apartado dedicado ás curtas no Festival de Cine de Berlín. Tras formarse en Bos Aires e na cidade alemá, dirixiu filmes como Panke, La destrucción del orden vigente e El contrabajo. Crítica de cine e comisaria de arte, Carmen Gray escribe desde a capital xermana para publicacións como The Guardian ou Sreen International. Forma parte do comité seleccionador do Festival de Curtametraxes Wintertur, en Suíza, e programou proxeccións en Rusia ou Portugal, alén de ter sido xurado en Berlín, Río de Janeiro e La Habana. Manu Yáñez dirixe a web Otros Cines Europa e colabora con cabeceiras como Fotogramas, El Cultural, Rockdelux ou a norteamericana Film Comment.

Os tres encargaranse de seleccionar as obras gañadoras da Ánfora de Ouro, da Ánfora de Prata e dos once premios técnicos, mentres que para as mellores curtametraxes galega e española se establecerá un xurado nacional, conformado por Mónica Camaño, Antonio Durán ‘Morris’ e Jorge Coira. A actriz canguesa, con experiencia en teatro, cine e televisión, acadou galardóns coma o María Casares á mellor interpretación secundaria. ‘Morris’, que conta con cinco premios Mestre Mateo, é un dos rostros máis recoñecidos da televisión galega e ten demostrado tamén o seu talento canda realizadores coma Fernando León ou Icíar Bollaín, amais de en series como a exitosa Fariña. O ano da carracha e a multipremiada 18 Comidas cóntanse entre as longametraxes de Jorge Coira, que obtivo ademais un Goya á mellor montaxe por El desconocido, alén de ter participado en series de ámbito autonómico e estatal.

O xurado da Sección Escolas Galegas compóñeno David Novas, Román Santiago e Susana Diz, que se encargarán de escoller as mellores curtas de cada unha das tres categorías nas que se estrutura este apartado:  facultades e escolas de imaxe, educación secundaria, e mais educación especial, infantil e primaria. O actor bueués David Novas formouse en arte dramática e axiña comezou a traballar en producións teatrais e musicais, dando logo o salto á televisión con series como Pulsaciones, Vidago Palace e Serramoura. Román Santiago, pola súa banda, é codirector e guionista da longametraxe Rendezvous, premiada en Miami ou Bos Aires, e da curta Dignidad Ciudadana, seleccionada en prestixiosos certames. A deseñadora gráfica Susana Diz forma parte da organización do festival de audiovisual escolar Olloboi e adoita impartir cursos de comunicación audiovisual para docentes.

Volver arriba