COMEZA O FICBUEU 2019 5/09/2019

O 12º Festival Internacional de Curtametraxes de Bueu abrirase mañá venres, 6 de setembro, cun gran acto de inauguración no que se estrearán as curtametraxes realizadas no marco da Área Social do FICBUEU, apoiada pola Obra Social ’la Caixa’, e nos obradoiros infantís impartidos ao longo do pasado curso. O evento, no que intervirán os colectivos participantes, contará coa presenza de destacados nomes do eido cinematográfico, como o realizador Alfonso Zarauza ou a directora artísitica Elia Robles.

Deste xeito, ás 20.30 horas proxectaranse no Centro Social do Mar os títulos Laura e Esther, autoría da Asociación Con Eles (Vilagarcía); O sopro da morte, obra de Xuntos Síndrome de Down (Pontevedra); Árbore caída, curta da Fundación Secretariado Xitano (Vigo), e mais Aìcul e La pajarera, filmes realizados por nenas e nenos de Bueu. No entanto, a música comezará a soar xa ás 20 horas nos exteriores do auditorio da man de AJB Collective, un concerto da Asociación de Jazz de Bueu incluído no plan provincial Pontegal. A banda acompañará ao público tamén á saída, ata o Punto de Encontro, onde terá lugar unha cata de viños cortesía da IXP Ribeiras do Morrazo, aderezada cun pincho de O Pulpeiro.

A xornada inaugural clausurarase coa actividade ‘Panorama de cinema mudo: 15 anos de pioneiros da sétima arte (1902-1917)’, na que Caspervek Trio se encargará de poñerlle banda sonora en directo a cinco clásicos das orixes do cine. Tanto para estas proxeccións con música ao vivo como para o acto inaugural será preciso recoller un convite no despacho de billetes, que estará aberto desde as 17 horas no Centro Social do Mar.

Proxeccións, charlas e concertos

A programación do FICBUEU 2019 intensificarase o sábado cunha variada axenda que arrincará ás 10.30 horas no Punto de Encontro co coloquio aberto ao público ‘Achegándonos, un café con Proxecta’, organizado canda a Coordinadora Galega de Festivais de Cinema e coa colaboración de Cafés Candelas. O debate xirará arredor do papel do voluntariado nos festivais e os desafíos que supón a súa xestión. Ás 11.30 horas terá lugar a charla ‘A dirección de arte no cinema’, na que Elia Robles descubriralles ás e aos asistentes a metodoloxía e a importancia desta disciplina, compartindo a súa experiencia. Na sesión presentarase ademais a longametraxe Ons, na que a conferenciante se encarga da dirección artística, para o que tamén estará presente o director da fita, Alfonso Zarauza. A xornada matinal completarase coa sesión vermú amenizada por High Paw meets Mr. Mou nos exteriores do Centro Social do Mar, onde que o público poderá escoitar á nova promesa do reggae estatal High Paw mentres degusta un Vermut Lodeiros.

Xa pola tarde, darán comezo as proxeccións da innovadora Sección Experimental no Museo Massó, con pases diferentes ás 16.30 e as 19.30 horas que se repetirán o o domingo. Ás 18 horas desenvolverase no Centro Social do Mar o Encontro con Luis Zahera, unha conversa en profundidade co gañador dun Goya na que se proxectarán as súas curtas máis emblemáticas e tras a que recibirá o Premio Cinema Galego FICBUEU 2019.

No mesmo espazo retomarase as proxeccións ás 20.30 horas, coa Sección Galicia R e o posterior coloquio cos cineastas no Punto de Encontro, ás 22 horas. A xornada culminará co directo do recoñecido artista barcelonés Enric Montefusco. Tanto para este concerto como para a sesión das curtas galegas poden adquirirse xa as entradas en www.ficbueu.com/entradas. As demais actividades do sábado serán de acceso gratuíto, aínda que para a cita con Zahera precisarase retirar unha invitación no despacho de billetes.

O domingo arrincará cun novo ‘Achegándonos: un café con CREA’, da man da Asociación de Profesionais da Dirección e Realización de Galicia, que dará paso á charla ‘Da curta á longa’, protagonizada polo director Xacio Baño. A sesión vermú correrá desta volta a cargo de Iván Rodríguez Covers mentres que, xa de tarde, se reeditará a Sección Experimental. Ademais, ás 17.30 horas realizarase en directo o programa de radio Carne Cruda e ás 20.30 horas proxectarase a Sección España, para rematar co monólogo ‘Miguel Lago, en directo’.

Durante a semana, as tardes terán unha estrutura semellante de luns a venres, xa que ás 17 horas se inicia a Sección Panorama, coas mellores producións mundiais que non entraron a concurso, mentres que os pases da Sección Internacional terán lugar ás 19.45 e ás 22 horas, con coloquio entre ambas as dúas sesións. Ás 18.15 horas gravaranse a diario distintos espazos radiofónicos con público en directo e, a partir dos martes, ás 20 horas programaranse curtas da Nouvelle Vague. Mércores, xoves e venres pola mañá haberá proxeccións para escolares. O sábado 14 desenvolverase ademais o Mini-FIC, con actividades para toda a familia, e mais os actos de peche. Estes darán comezo ás 20 horas cun concerto de The Swinging Flamingos, media hora antes de que se celebre a Gala de Clausura, coa posterior festa para as persoas asistentes.

Volver arriba