ACTIVIDADES PARA NENOS E GALA 13/09/2019

Cineastas internacionais e profesionais galegos daranse cita na Gala de Clausura que porá mañá punto e final a un intenso FICBUEU 2019. Destacados intérpretes como Xulio Abonjo, María Vázquez ou Cris Iglesias, e directores multipremiados como Andrés Goteira, Khris Cembe ou David Fidalgo mesturaranse co público nunha concorrida cerimonia de entrega de premios, se ben a axenda do 12º Festival Internacional de Curtametraxes de Bueu continúa esta tarde e mañá cun amplo programa.

Tras tres xornadas de proxeccións para alumnado, as actividades destinadas á rapazada siguen mañá ás 11 horas coa Gala Escolas Galegas no Centro Social do Mar, onde se entregarán os premios e se proxectarán as obras gañadoras das tres categorías nas que se subdivide este apartado: educación especial, infantil e primaria; educación secundaria, e  mais facultades e escolas de imaxe. O evento, que pon en valor o gran traballo que se está a realizar desde os centros educativos en materia audiovisual, é aberto ao público e estará dinamizado pola actriz e narradora Beatriz Campos, coa colaboración da editorial Kalandraka.

De seguido, ás 12.15 horas, desenvolverase o obradoiro ‘O cine soa ben’, no que Caspervek Trio porá de relevo o importante papel que cumpre a música no cinema, complementando e realzando os contidos visuais, ao tempo que retará ás familias a identificar diferentes filmes pola súa banda sonora, todo co apoio da musicóloga e pedagoga Erea Carbajales. En paralelo, ás 12.30 horas dará comezo no Punto de Encontro a charla ‘A produción dunha película’ a cargo de Sergio Frade. O produtor executivo de Frida Films desvelaralle ao público o complexo proceso de sacar adiante un proxecto cinematográfico, en especial a autoprodución de curtas.

Xa pola tarde, continuarán as propostas para os máis pequenos ás 17 horas no Punto de Encontro coa actividade ‘Contos e cinema’, que fusionará as historias narradas por Olalla González e as ilustracións en tempo real de Marc Taeger que se verán na pantalla. Ás 18 horas, nos exteriores do Centro Social do Mar, Peter Punk e Brais das Hortas ofrecerán o Concerto PunkInfantil, no que un rockeiro e un cantante infantil se verán na obriga de compartir escenario. Unha descarga de música ao vivo, humor e malabares.

As actividades de peche do 12º Festival Internacional de Curtametraxes de Bueu iniciaranse ás 20 horas nas inmediacións do Centro Social do Mar coa música de The Swinging Flamingos, un concerto con moito swing encadrado no plan provincial Pontegal. Ás 21 horas arrincará no auditorio a Gala de Clausura, na que se entregarán os galardóns ás obras premiadas e volverán proxectarse os filmes gañadores da Ánfora de Ouro e o Premio do Público. Todas as actividades do sábado serán de acceso gratuíto agás a Gala, para a que xa non hai butacas.

Ademais dos autores das curtas, no acto estarán presentes destacados persoeiros do sector cinematográfico e representantes do Concello de Bueu, Deputación de Pontevedra e Xunta de Galicia, entre outras entidades patrocinadoras, que desfilarán ante o tapiz de flores elaborado pola Asociación Cultural Alfombras de Corpus de Bueu. A cerimonia, que estará conducida polo actor César Aldea acompañado por Severiano Casalderrey ao piano, poderá seguirse en streaming e comentarse a través das redes sociais. As e os asistentes asistirán despois no primeiro andar á festa de peche, un encontro entre organización, convidados e público onde se degustará entre outros polbo de O Pulpeiro regado con viños da IXP Ribeiras do Morrazo.

Antes de que chegue o gran momento para os cineastas, os convidados internacionais do FICBUEU 2019 están a coñecer a nosa riqueza cultural, natural e gastronómica da man de Turismo de Galicia. Se onte visitaron Cabo Udra coa colaboración de Estela Arqueoloxía e Patrimonio, hoxe viaxaron á Illa de Ons con Nabia e mañá ás 16.30 horas gozarán dun paseo pola ría a bordo das embarcacións tradicionais da asociación Os Galos. Previamente, no xantar, terán ocasión de coñecer as excelencias do noso mar con pescadeRías, que organiza unha visita guiada polo peirao, a lonxa e a praza de abastos, onde asistirán a un show cooking.

No entanto, na xornada de hoxe aínda quedan diversas actividades, case todas con entrada de balde. Ás 17 horas proxéctase a Sección Panorama e ás 18.15 horas realizarase en vivo o exitoso podcast radiofónico ‘El cine de loqueyotediga’, con entrevistas a cineastas internacionais e a Andrés Goteira, director de ‘Dhogs’ e membro do xurado nacional do FICBUEU 2019. Ás 20 horas será a oportunidade final para ver no Museo Massó curtas da Nouvelle Vague. Ás 19.45 e ás 22 horas desenvolveranse asemade os últimos pases da Sección Internacional, para os que se venderán ás derradeiras entradas no despacho de billetes a partir das 16.30 horas. O coloquio cos directores convidados dará comezo ás 21.15 horas no Punto de Encontro.

Volver arriba