← Volver

Xosé Antón Cascudo será o encargado de impartir este curso de guión para afeccionadas e afeccionados ao cinema durante as xornadas do venres 10 ás 16:30 e sábado 11 ás 17:00, cunha duración de 4 horas cada unha.

O obradoiro terá un plantexamento teórico-práctico. Constará dunha primeira parte na que se achegarán nocións e conceptos sobre estrutura dramática e construción de personaxes, para rematar realizando un exercicio práctico de escritura dunha secuencia.

Cascudo, que pertencente á xunta directiva da Asociación Galega de Guionistas (AGAG), é licenciado en Historia da Arte e Comunicación Audiovisual.  Ao longo da súa carreira ten guionizado e dirixido diversos filmes: A realidade máxica (2008), Alfa i Omega (2014) e O instante eterno (2014) entre outros. Cun perfil multidisplinar, ademáis de guionista, Cascudo escribe poesía e imparte clases en Imaxe e Son no IES Xelmírez I.

• A selección das 10 persoas participantes farase segundo a orde de inscrición.
• As xornadas serán presenciais terán lugar en Bueu.
• O formulario permanecerá aberto ata o día 5 de setembro.

← Volver

• Volve Carne Cruda e ofértanse múltiples actividades de balde.

As entradas e abonos para as proxeccións do 14º Festival Internacional de Curtametraxes de Bueu, que se celebrará no Centro Social do Mar do 10 ao 19 de setembro, xa están á venda en www.ficbueu.com/tenda. As sesións competitivas e os filmes de apertura e peche terán un custo de 3 euros, aínda que para as cinco xornadas da Sección Internacional poderá adquirirse un abono por 12 euros. A asistencia ao programa radiofónico Carne Cruda, que se realizará ao vivo o sábado 11 ás 18 horas, terá un prezo de 5 euros.

A Sección Internacional desenvolverase do luns 13 ao venres 17 con dous pases a elixir, ás 20 e ás 22 horas, e cun faladoiro entre ambas as dúas que terá lugar no Punto de Encontro. Para as seccións Galicia R e España, que se poderán ver o sábado 18, só hai entradas soltas. Da primeira organizaranse dúas sesións, ás 17 e ás 19 horas, mentres que a segunda comezará ás 21 horas. En senllos casos o público poderá participar no coloquio posterior coas e cos cineastas.

Na fin de semana anterior, o sábado 11 e o domingo 12, proxectaranse ás 20 horas os dous bloques da Sección Experimental, con programas diferentes. O mesmo acontecerá ás 22 horas coa Sección Panorama, onde a entrada será a doazón dalgún produto non perecedoiro destinado ao Banco de Alimentos. Outra das novidades deste ano é o filme de apertura, para o cal o recoñecido crítico cinematográfico Javier Tolentino se achegará a Bueu o venres 10 ás 22 horas a fin de presentar a súa primeira longametraxe, Un blues para Teherán. Así mesmo, o domingo 19 ás 21:30 horas proxectarase como filme de peche Sole, ópera prima do italiano Carlo Sironi, membro do xurado do FICBUEU 2021, que aborda o polémico tema da maternidade subrogada.

O resto das proxeccións, entre as que se atopan as seccións Retrospectiva e Carta branca, centradas no National Film Board of Canada, e mais as Curtas en familia, terán carácter gratuíto, aínda que vai ser preciso retirar unha invitación no despacho de billetes o mesmo día da súa celebración. O acceso será idéntico para outra ducia de actividades entre conferencias, concertos, presentacións, etc. que se ofertarán con entrada de balde.

O despacho de billetes abrirase na semana previa á inauguración, do luns 6 ao xoves 9 de setembro, de 17 a 20 horas, mentres que nas datas do festival, do venres 10 ao domingo 19, o horario será de 16:30 a 22 horas. Ademais, nas fins de semana tamén estará operativo polas mañás, de 10 a 13 horas. Nestas franxas poderán recollerse os convites, trocar o resgardo da compra virtual polos tickets ou mercar as entradas reservadas para a venda física. O venres 17 deberán adquirirse presencialmente as entradas para a Gala de Clausura, ao prezo de 3 euros.

← Volver

• O segundo dos Cadernos do festival analiza a maior produtora pública do mundo, sobre a que tamén xira a Sección Carta Branca.

Se o Festival Internacional de Curtametraxes de Bueu inauguraba en 2019 a Sección Retrospectiva para botar unha ollada ás curtas da Nouvelle Vague, este ano pon a mirada nas obras do National Film Board of Canada, a maior produtora pública do mundo, que tamén protagoniza o segundo dos Cadernos FICBUEU. O programa do festival, que se desenvolve do 10 ao 19 de setembro no Centro Social do Mar, incorpora ademais como novidade unha Carta Branca comisariada por Marc Bertrand, veterano produtor de animación do NFB.

O luns 13 ás 16:30 horas terá lugar a presentación de Cadernos FICBUEU #2: O National Film Board of Canada e a súa “idade dourada” da curtametraxe (1965-83), monográfico editado en galego e inglés co apoio da Secretaría Xeral de Política Lingüística da Xunta de Galicia e mais da Embaixada de Canadá en España. O subdirector do FICBUEU e responsable da publicación, Severiano Casalderrey, exporá os detalles deste estudo, co que se amplía o carácter divulgativo e investigador do Festival Internacional de Curtametraxes de Bueu.

A presentación pecharase coa proxección de In the labyrinth (1979), como apertura da Retrospectiva que se desenvolverá do martes 14 ao venres 17 ás 17:30 horas. Con esta sección, búscase poñer en valor curtametraxes que tiveron un importante papel na historia do cinema, desta volta repasando as case dúas décadas desa “idade dourada” do NFB a través de 24 filmes que ofrecen unha variada panorámica de xéneros e temáticas. Ademais, as persoas que asistan ás catro sesións levarán de balde un exemplar de Cadernos FICBUEU #2.

O National Film Board of Canada centrará aínda a Sección Carta Branca, con cinco títulos seleccionados por Marc Bertrand, quen desde 1998 vén exercendo como produtor no estudo de animación francés da NFB e conta con máis dun cento de traballos ás súas costas, moitos deles recoñecidos con importantes galardóns. Bertrand estará en Bueu o luns 13 de setembro para presentar esta escolma, que se proxectará a partir das 18 horas.

Por último, cómpre sinalar que Canadá vai estar tamén presente na Sección Internacional, con tres curtas das 24 que compoñen o principal apartado competitivo do FICBUEU 2021. Tanto as diversas proxeccións como as múltiples actividades paralelas, que inclúen desde conferencias e debates ata concertos e radio en directo, desenvolveranse con todas as medidas de seguridade fronte a Covid-19. O evento conta coa colaboración de diferentes entidades, entre as que destacan o Concello de Bueu, a Deputación de Pontevedra, a Xunta de Galicia e o ICAA.

← Volver

• Recibíronse 77 traballos, a metade de centros de Secundaria.

Nove curtametraxes realizadas en centros educativos integran a Sección Escolas Galegas do 14º Festival Internacional de Curtametraxes de Bueu, da que sairán os títulos gañadores das tres categorías nas que se subdivide este apartado do certame que busca promover os novos valores do audiovisual. Presentáronse un total de 77 traballos, dos que 38 foron realizados por alumnado de Secundaria. O equipo seleccionador destacou a gran variedade e calidade das obras recibidas, que abranguían distintos xéneros, como documental, animación, videoclip, ficción, etc. As curtas finalistas son as seguintes:

Mellor Curtametraxe de Educación Especial, Infantil e Primaria

• Dona Landra no río revolto – CEIP Plurilingüe A Pedra (Bueu)
• Heroes enmascarados – CEIP do Carballal (Marín)
• O misterio do bolso – CEIP A Guía (Moaña)

Mellor Curtametraxe de Educación Secundaria

• E se chove que chova! – IES María Soliño (Cangas)
• Miss each other before we need – IES As Barxas (Moaña)
• Monte vivo – IES Félix Muriel (Rianxo)

Mellor Curtametraxe de Escolas de Imaxe e Facultades

• Golden boy – IES Audiovisual de Vigo
• Night keeper – Escola de Imaxe e Son de Vigo
• O que queda de nós – Facultade de Ciencias Sociais e da Comunicación (UVigo)

O xurado da Sección Escolas Galegas, que se reúne hoxe en Bueu para visionar as curtas seleccionadas, está integrado polo director e produtor Pablo Cacheda, a artista multidisciplinar Lara Alonso e a profesora Sara Pena. As obras gañadoras anunciaranse o 19 de setembro na gala escolar do FICBUEU 2021, na que colaboran Kalandraka e a Fundación Novas.

O mesmo xurado escollerá tamén a Mellor Curtametraxe de Escolas Internacionais, premio ao que optan as seguintes obras:

• The de facto martyr suite, Justine de Gasquet (Suíza)
• Helfer, Anna Szöllösi (Hungría)
• Finis Terrae, Tommaso Frangini (Italia)
• Hiljaisuus, Saara Hakkarainen (Finlandia)
• O black hole!, Renee Zhan (Reino Unido)
• Coffin, Yuanqing Cai, Houzhi Huang, Mikolaj Janiw, Nathan Crabot, Mandimby Lebon e Theo Tran Ngoc (Francia)

← Volver

• Proxeccións para a rapazada, aulas maxistrais, faladoiros, música ou radio en directo forman parte do programa desta 14ª edición.

O Festival Internacional de Curtametraxes de Bueu, que se celebra do 10 ao 19 de setembro, retoma a estrutura e os contidos previos á pandemia con nove seccións cinematográficas e múltiples actividades paralelas, que van desde conferencias e coloquios ata concertos e radio en directo. No entanto, o evento manterá nesta 14ª edición todas as medidas de seguridade fronte a Covid-19 contempladas na normativa vixente.

As proxeccións da Sección Internacional, que constitúen o tronco central do programa, desenvolveranse do luns 13 ao venres 17 con dous pases, ás 20 e ás 22 horas, conformados por títulos diferentes e cun faladoiro entre ambos os dous dinamizado por persoas expertas. No entanto, o FICBUEU 2021 dará comezo o venres 10 de setembro ás 19.15 horas coa actuación en exteriores do dúo de versións ‘Two in the mirror’, previa ao acto inaugural que se celebrará ás 20 horas no Centro Social do Mar, onde ás 22 horas se proxectará o filme de apertura, Un blues para Teherán, coa participación do seu director, Javier Tolentino.

O sábado 11 e o domingo 12 haberá senllas palestras matinais a partir das 11:30 horas, unha sobre a cartelería de cine a cargo do estudio Barfutura, responsable da imaxe de Julieta ou Las chicas del cable, e outra sobre stop motion coa model maker Sonia Iglesias, quen traballou con Tim Burton. Xa pola tarde, na primeira fin de semana proxectarase ás 20 horas a Sección Experimental e ás 22 horas a Panorama. Con anterioridade, ás 18 horas o sábado volverá o programa radiofónico Carne Cruda, e o domingo presentarase a webserie de animación Cacola.

O luns 13 de setembro, a actividade dará comezo ás 16:30 horas coa presentación do segundo dos Cadernos FICBUEU, centrado desta volta nas curtas da National Film Board of Canada, para dar paso ás 18 horas á Sección Carta Branca, comisariada polo produtor de animación da NFB Marc Bertrand. Os títulos da produtora pública canadense centrarán a Sección Retrospectiva, que se estenderá durante os catro días seguintes ás 17:30 horas. Ademais, o martes 14 ás 18 horas terá lugar unha mesa redonda en liña sobre o financiamento dos festivais de cinema con representantes Clermont-Ferrand (Francia), Morelia (México) e Xixón.

A última fin de semana do FICBUEU 2021 arrincará o sábado 18 ás 11 horas co ‘Encontro con Alfonso Agra’, actor que recibirá o Premio Cinema Galego. En paralelo, o Museo Massó acollerá a unha mesa sobre a comunicación nos certames cinematográficos auspiciada por Proxecta, coordinadora galega de festivais de cinema. Media hora máis tarde, proxectaranse curtas para toda a familia no marco da Sección Minific, que darán paso ao concerto da sesión vermú.

Xa pola tarde, ás 17 e ás 19 horas haberá pase dobre da Sección Galicia R, con coloquio posterior coas e cos cineastas, mentres que ás 21 horas se desenvolverá a Sección España e o seu correspondente debate. O domingo 19 estará centrado nas entregas de premios e na rapazada, que ás 10:30 horas protagonizará a Gala Escolas Galegas e ás 13 horas gozará do obradoiro ‘As orixes do cine’, con imaxes e música en directo da man de Caspervek. A partir das 17 horas, as actuacións musicais ao aire libre darán paso á Gala de Clausura do FICBUEU 2021, que comeza ás 19 horas, mentres que ás 21:30 horas se proxecta o filme de peche Sole.

Pases para alumnado de centros educativos, obradoiros de guión e rodaxe con colectivos profesionais, o mercado da curtametraxe ou a ruta de tapas son outras das actividades que se desenvolverán no marco do 14º Festival Internacional de Curtametraxes de Bueu. O evento conta coa colaboración de diversas entidades, entre as que destacan o Concello de Bueu, a Deputación de Pontevedra a través da marca #riasbaixasfilmfest, a Agadic da Xunta de Galicia e o ICAA.

← Volver

• O galardoado, coñecido polos seus papeis en numerosas series galegas, manterá un encontro co público no marco do festival.

O actor arzuán Alfonso Agra recibirá o Premio Cinema Galego do FICBUEU 2021, galardón que recoñece a traxectoria de profesionais da industria audiovisual galega e que anteriormente recibiron intérpretes como Antonio Durán ‘Morris’, Mabel Rivera, Luis Zahera ou Melania Cruz. Ademais, o homenaxeado manterá un encontro co público no que se desvelarán algunhas das facetas máis descoñecidas da súa dilatada carreira.

Alfonso Agra iniciouse no mundo da interpretación nos anos 80 da man da compañía viguesa Artello. Durante dúas décadas alternou os traballos neste grupo teatral con espectáculos do Centro Dramático Galego, como Os vellos non deben de namorarse, amais de coprotagonizar posteriormente a aclamada O florido pénsil. No entanto, é coñecido sobre todo polos seus papeis en series galegas como Pratos Combinados, Mareas Vivas ou Serramoura.

Agra ten tamén experiencia como presentador, tanto de informativos como de programas de entretemento. No eido da dobraxe púxolle voz a personaxes tan populares como Yamcha, de Dragon Ball. Na gran pantalla, vímolo nos filmes Entre bateas e Días de voda, alén doutros moitos. Nos últimos anos, afianzou a súa traxectoria sumándose ao reparto de series autóctonas con proxección internacional, entre as que destacan Fariña, na que interpretaba ao narco Manuel Bustelo, e recentemente a produción de Netflix El desorden que dejas.

Estas e outras moitas facetas do actor, como o seu paso polo mundo da curtametraxe, abordaranse no ‘Encontro con Alfonso Agra’, que se celebrará o sábado 18 de setembro ás 11 horas no Punto de Encontro do FICBUEU, situado na sala multiusos do Centro Social do Mar. O realizador marinense Gaspar Broullón será o encargado de conducir a entrevista en profundidade co merecedor do Premio Cinema Galego, a quen ás e os asistentes tamén poderán lanzarlle as súas preguntas. Será na penúltima xornada do 14º Festival Internacional de Curtametraxes de Bueu, que se desenvolverá desde o día 10 cun amplo abano de actividades.