Bueu, 31/07/2026 – O Festival Internacional de Cinema de Bueu reunirá profesionais de todo o mundo para decidir un palmarés que repartirá preto de 5.000 euros en premios na súa 19ª edición.
O Festival Internacional de Cinema de Bueu (FICBUEU), que celebrará a súa décimo novena edición entre o 4 e o 19 de setembro, contará cunha destacada representación internacional entre os xurados desta edición. O Xurado Oficial e o Xurado Descubertas, reunirán seis profesionais de referencia da creación, a produción, a programación, a montaxe, a investigación e a crítica cinematográfica para decidir o palmarés dunha edición que repartirá preto de 5.000 euros en premios.
O Xurado Oficial estará integrado por tres figuras cunha ampla traxectoria no ámbito da curtametraxe e dos festivais internacionais. A arxentina Magdalena Arau, programadora do BAFICI desde 2016, docente universitaria e asesora de proxectos audiovisuais, achega unha experiencia que abrangue a programación, a formación e a participación como xurado en festivais e fondos de desenvolvemento de diferentes países, converténdoa nunha das voces máis recoñecidas do panorama cinematográfico latinoamericano.
Xunto a ela participará o cineasta, programador e fotógrafo iraniano Amir Masoud Soheili, autor de curtametraxes recoñecidas en festivais como Tallinn Black Nights, Leeds ou Interfilm Berlin e membro de equipos de programación en certames de Asia, Europa e África. A súa traxectoria combina a creación audiovisual coa promoción do cinema independente a nivel internacional.
Completa este xurado o portugués Miguel Dias, fundador e director do Curtas Vila do Conde e director da Agência da Curta Metragem, que leva máis de tres décadas impulsando a difusión e a produción da curtametraxe portuguesa, ademais de desenvolver un intenso labor como programador e comisario cinematográfico.
Xurado Descubertas: tres miradas ao cinema actual
Pola súa banda, o Xurado Descubertas estará formado pola produtora Silvia Fuentes, a montadora e realizadora Laura Piñeiro e o investigador e crítico Aarón Rodríguez Serrano, tres perfís complementarios que representan distintas formas de entender o cinema contemporáneo.
Como produtora e fundadora de Sétima, Silvia Fuentes impulsou nos últimos anos algúns dos títulos máis destacados do cinema galego recente, como As liñas descontinuas ou Filmei paxaros voando.
Laura Piñeiro desenvolve a súa actividade como montadora cinematográfica e realizadora no ámbito do cinema independente galego. Forma parte tamén dos equipos de programación da Mostra Internacional de Cinema Etnográfico e do Festival Intersección.
Pechando este xurado, Aarón Rodríguez Serrano é catedrático de Narrativa Audiovisual na Universitat Jaume I, investigador especializado en análise fílmica e autor de numerosas publicacións de referencia sobre cinema contemporáneo, compatibilizando a súa actividade académica coa crítica cinematográfica e a asesoría de guión.
O Xurado Oficial será o encargado de conceder o Premio FICBUEU, así como os galardóns á Mellor curtametraxe galega e á Mellor curtametraxe española. Pola súa parte, o Xurado Descubertas decidirá as obras gañadoras das categorías Descubertas, GZ_00 e Escolas Internacionais, completando un palmarés que tamén incluirá o Premio do Público e os recoñecementos das seccións educativas. Ademais, cabe destacar que a Academia de Cine incorporou o FICBUEU á listaxe oficial de festivais cualificadores para os Premios Goya nas categorías de Mellor Curtametraxe de Ficción, Mellor Curtametraxe Documental e Mellor Curtametraxe de Animación.
Coa composición destes dous xurados, o FICBUEU reforza a súa vocación internacional e o seu compromiso cunha mirada plural sobre a creación audiovisual contemporánea, reunindo en Bueu profesionais procedentes de distintos países e ámbitos do sector para valorar unha escolma das mellores curtametraxes do panorama actual.
