A «SECCIÓN OFICIAL» DO FICBUEU AMOSARÁ O MELLOR E MÁIS RECENTE CINEMA DE AUTORA E AUTOR CON 29 CURTAS DE 18 PAÍSES 

16.08.24. BUEU. O Festival Internacional de Cinema de Bueu, o FICBUEU, descubrirá ás súas espectadoras e espectadores na súa décimo sétima edición un total de 29 curtametraxes do mellor e máis innovador cinema de autora e autor realizadas durante o último ano en todo o mundo. Entre o 6 e o 14 de setembro, a «Sección Oficial» do certame amosará ao público películas de distintos xéneros (ficción, animación, documental…) chegadas de 18 países: desde Brasil, Lituania, Estados Unidos, Filipinas, Portugal ou Bélxica a Líbano, Estonia, Andorra, Italia, Alemaña ou Canadá, pasando por República Checa, Suíza, Reino Unido, Países Baixos, Francia e España, representada por media ducia de curtas.

Estreas en España e en Galicia

A escolma realizada polo FICBUEU 2024 supón ademais unha oportunidade única para coñecer as últimas e máis interesantes propostas cinematográficas que se están a desenvolver a nivel internacional no formato curto. De feito, case a metade dos filmes a concurso no festival bueués (13 curtametraxes) son estreas en España e outros 11 proxectaranse por vez primeira en Galicia. A maioría das películas foron nomeadas e premiadas nos últimos meses en festivais de cinema tan prestixiosos coma os de Cannes, Venecia, Berlín, Róterdam, Clermont-Ferrand, Annecy, Chicago, Locarno ou o South by Southwest (SXSW) de Austin, en Texas (EE.UU.).

Xunto á categoría oficial a concurso, no FICBUEU 2024 hai outras seccións competitivas. Trátase de «Descubertas» e «GZ_00», que permitirán ver o que están a facer as novas xeracións de cineastas, tanto en Galicia coma no resto do mundo, e de «Escolas de Cinema» e «Centros de Ensino», que achegarán ao público do festival pezas creadas pola incipiente canteira cinematográfica. Entre as catro categorías, veranse unha vintena de curtas.

Máis aló das proxeccións

O FICBUEU 2024 voltará convidar ao público a participar nas diferentes actividades relacionadas coa sétima arte. Xunto aos coloquios con cineastas dalgunhas das películas seleccionadas a concurso, o sábado 7 de setembro chegarán as «Xornadas Cinematográficas». O festival inclúeas na súa programación por terceiro ano consecutivo coma espazo de reflexión sobre cinema. Nesta décimo sétima edición abordarán a súa relación coa política. Haberá unha masterclass a cargo do profesor de Filosofía Política Camil Ungureanu, á que seguirán unha conversa sobre o Holocausto e a Segunda Guerra Mundial -o acontecemento histórico e político máis representado no cinema- entre as críticas e programadoras cinematográficas Belit Lago e Daniela Urzola; unha mesa redonda online con parte do equipo do podcast «La escóbula de la Brújula» sobre o uso do cinema coma arte e ferramenta de propaganda; e un encontro co director Jaime Rosales (Petra, Girasoles silvestres) para analizar o cinema dos últimos 25 anos a través de temas clave coma o trunfo da distopía, os efectos da tecnoloxía ou a emerxencia climática. A xornada rematará coa proxección da película The Conversation, realizada en 1974 por Francis Ford Coppola, protagonizada por Gene Hackman e John Cazale e cuxa trama xira arredor das escoitas coma método de espionaxe.

Outra das actividades programadas é o encontro que manterán co público o domingo 8 (12.00 horas) o realizador ourensán Rodrigo Cortés, o escritor súper vendas Juan Gómez-Jurado e o guionista e comunicador Arturo González-Campos, integrantes de dous dos pódcasts culturais máis interesantes que se emiten en España, «Todopoderosos» e «Aquí hay dragones». Falarán do impacto do cambio que supuxo a chegada do son ao cinema. Esa mesma tarde, os tres asinarán libros nun evento ao que se poderá acceder de balde tras retirar o correspondente convite no despacho de billetes. Os pases estarán dispoñibles durante a mañá do domingo 8 e ata o inicio do acto.

Caderno #5 para Jonas Mekas e o seu cinema experimental

A participación de especialistas da sétima arte e o audiovisual complétaa o encontro que o público do FICBUEU terá coa profesora Nieves Febrer. É a autora do Caderno #5 do festival, que repasa a figura de Jonas Mekas, cineasta experimental, axitador cultural e pai do cinema de vangarda estadounidense. Presentarao o sábado 14 de setembro. O certame tamén lle dedicará a Mekas a sección «Retrospectiva», na que se proxectarán oito das súas curtametraxes.

Ese mesmo día farase entrega dos galardóns do FICBUEU 2024, entre eles o Premio Cinema Galego, outorgado á actriz viguesa María Vázquez en recoñecemento á súa traxectoria e á súa contribución ao cinema galego e estatal. Dende o luns 16 de setembro, co MINIFIC, regresarán as actividades infantís, as proxeccións para centros de ensino da zona de Bueu e a sesión de curtas en familia.