Bueu, 17/07/2025 – O Festival de Cinema de Bueu presenta un dos focos centrais da programación da vindeira edición, que se celebrará do 5 ao 20 de setembro.
A través dos cinco filmes que compoñen a Sección Retrospectiva, e que terá lugar o sábado 13 de setembro ás 17:00 H no auditorio do Centro Social do Mar, abordarase a figura da exiliada/o e a cuestión identitaria. Estas pezas exploran, arredor do concepto de exilio, diferentes respostas narrativas e estéticas de cineastas de vangarda como Alexander Kluge, Joao Cesar Monteiro, Chantal Akerman, Pier Paolo Pasolini e Jomí García Ascot.
- Brutalität in Stein (Brutalidade en pedra, 1961) foi a primeira película realizada polo cineasta alemán Alexander Kluge. Nela aborda o retorno ás ruínas e á barbarie do ideario nazi promovido polo Terceiro Reich.
- O portugués João César Monteiro, tamén no seu debut como director, forza o reencontro da palabra poética coa voz e o corpo de quen a concibe. Exilio e retorno, neste caso, sobre a poeta, tamén portuguesa, Sophia de Mello Breyner Andresen (1969).
- A cineasta belga Chantal Akerman desprega en La Chambre (O cuarto, 1972) un delicado exercicio de auto observación nesta obra filmada durante o exilio de Akerman na cidade de Nova York.
- Pier Paolo Pasolini entréganos con Pasolini e la forma della città (Pasolini e a forma da cidade, 1974) un ensaio cinematográfico no cal o poeta italiano entoa unha advertencia premonitoria sobre a ameaza fascista.
- E en toda esta escoloma de xestos fílmicos relacionados co exilio, o centro ocúpao a case descoñecida curtametraxe de Jomí García Ascot, Remedios Varo 1913-1963 (1967). García Ascot abraza aquí a voz de María Luisa Elío para aventurase agora nas profundidades da pintura de Remedios Varo.
Todo este universo serviu de inspiración para chegar á imaxe definitiva desta 18ª edición do FICBUEU. Traballouse arredor da idea de xogo coas texturas e a aplicación de cor sobre diversos fotogramas pertencentes á curtametraxe Remedios Varo 1913-1963, de Jomí García Ascot. Deste xeito, faise referencia a movementos de calor e ao propio uso da textura de mapa como referencia á deslocalización como motor creativo e estético.
Nesta edición do festival, o investigador e docente José Manuel Mouriño é autor do Caderno FICBUEU #6. O destino como forma. Imaxes do exilio / exilios da imaxe, en diálogo cos cinco títulos que conforman a Sección Retrospectiva, da que tamén é curador e a través da cal propón unha exploración entre o concepto de exilio e o mundo da imaxe cinematográfica e audiovisual.
O caderno FICBUEU #6, forma parte da serie de publicacións anuais coas que o FICBUEU busca contribuír á bibliografía e historiografía cinematográficas, centrando o foco nas curtametraxes, un formato habitualmente esquecido nos libros de historia do cinema.
Este número, o Caderno FICBUEU #6. O destino como forma. Imaxes do exilio / exilios da imaxe, profundiza na relación entre o concepto de exilio e o mundo da imaxe cinematográfica a través dos procesos de búsqueda e reflexión de dúas mulleres poetas e creadoras, a actriz María Luisa Elío e a filósofa María Zambrano.
A partir do seu pensamento, o texto explora a forma na que determinadas autoras e autores asumen o proceso creativo, esencialmente, como unha vivencia; confluíndo (e confundindo) vida e obra.
O estudo de base desta publicación é unha liña e investigación do Laboratorio María Zambrano de poética audiovisual, da Fundación Zambrano Vélez- Málaga.
A presentación do Caderno FICBUEU #6, da man do seu autor José Manuel Mouriño, terá lugar o sábado 13 de setembro ás 11:00 H. na Sala Amalia Domínguez Búa. Esta actividade contará ademais coa presenza de Diego García, fillo de Jomi García Ascot, director dun dos filmes que conforma a Sección retrospectiva, Remedios Varo 1913-1963 (1967).
