Bueu, 15/05/2025 – O FICBUEU abre a convocatoria para a Sección Escolas da súa 18ª edición. Esta sección está dedicada ao traballo audiovisual desenvolvido en centros de ensino, facultades e escolas de formación, e conta cun espazo propio dentro do certame desde hai varios anos.
A Sección Escolas conta con tres categorías competitivas: Educación Especial, Infantil e Primaria e Educación Secundaria (ambas para os centros galegos) e Facultades e Escolas de Cinema Galegas.
As bases da convocatoria e o formulario de inscrición das curtametraxes están dispoñibles en www.ficbueu.com/minific, páxina que permanecerá aberta ata o 30 de xuño, data de peche da convocatoria.
Poderán inscribirse todas as obras audiovisuais realizadas nos cursos 2023/2024 e 2024/2025 que non participaran en edicións anteriores. A convocatoria está aberta a centros de ensino, facultades e escolas de formación audiovisual con sede en Galicia.
As obras seleccionadas anunciaranse en agosto de 2025 e poderán optar aos seguintes premios:
- Mellor Curtametraxe de Educación Especial, Infantil e Primaria: Trofeo e formación audiovisual.
- Mellor Curtametraxe de Educación Secundaria: Trofeo e formación audiovisual.
- Mellor Curtametraxe de Escolas de Imaxe e Son e Facultades Galegas: Trofeo e formación audiovisual.
As curtas gañadoras daranse a coñecer durante a Gala Escolas Galegas FICBUEU 2025, que se celebrará en setembro, no marco da semana do MiniFIC, en colaboración con Kalandraka e a Fundación Novas.
