Actividades

CONCERTO. FURANCHOLOGY

VENRES 5 ÁS 19:30H. EXTERIORES DO CENTRO SOCIAL DO MAR

Para dar comezo á 18ª edición do FICBUEU contaremos coa actuación en directo do grupo Furanchology, trío galego de psych-soul jazz instrumental. Cun repertorio formado por composicións propias, a música de Furanchology parte principalmente do rock psicodélico e o jazz eléctrico dos anos 60 e 70 para fusionarse con estilos como o soul, o funk, o punk ou a cumbia.

APERTURA. ESTREA DE ROMERÍA DE CARLA SIMÓN

VENRES 5 ÁS 20:30H. AUDITORIO

A presentación da 18ª edición do FICBUEU complementarase coa proxección da película Romería, de Carla Simón, o mesmo día no que se estrea en salas. Será un evento único que contará coa presenza no Auditorio do Centro Social do Mar de parte do equipo que traballou na película: o actor e director Alberto Gracia e a actriz Marina Troncoso. Rodada en diferentes localizacións das Rías Baixas, trátase da terceira longametraxe da directora catalá, quen, tras o éxito de Estiu 1993 e Alcarràs, continúa explorando os vínculos familiares, un dos temas centrais da súa filmografía.

ENCONTROS PROFESIONAIS. DIÁLOGOS SOBRE COMPOSICIÓN

SÁBADO 6 ÁS 11:00H. SALA MULTIUSOS

A mañá das Xornadas cinematográficas estará ocupada por tres diálogos entre profesionais do mundo da composición para cine e series, cuns emparellamentos pensados para xuntar a profesionais con ampla carreira no sector con persoas máis noveis. Esas conversas culminarán tras o terceiro diálogo cun encontro entre os seis profesionais, no que o público asistente tamén poderá participar.

No primeiro diálogo da xornada atoparanse Alicia Morote e Gustavo Gill, que falarán sobre como dar os primeiros pasos no sector da música para cine e dos procesos de escritura, produción e narrativa da canción. Xuntos analizarán os condicionantes artísticos, dramáticos e técnicos que poden presentar eses procesos.

A segunda conversa estará protagonizada por Iván M. Lacámara e Mara Villavicencio e terá a tecnoloxía como piar fundamental. Lacámara e Villavicencio falarán de como os sintetizadores e a hibridación sonora afectan á linguaxe musical audiovisual, ao tempo que afondarán na importancia dos “temp tracks” ou referencias musicais provisionais.

Alberto Torres e Gabi Martínez atoparanse nunha terceira conversa para abordar a relación entre o deseño sonoro e a música, así como da construción dun guión musical que permita estruturar a narrativa.

CLASE MAXISTRAL. DO CLASICISMO Á MODERNIDADE: AS COMPOSITORAS DE BANDAS SONORAS

SÁBADO 6 ÁS 16:30 H. SALA MULTIUSOS

Doreen Carwithen, Shirley Walker, Rachel Portman, Hildur Guðnadóttir e Mica Levi serán algunhas das compositoras protagonistas desta clase maxistral onde poderemos descubrir os aportes das mulleres á historia da música no cine. A palestra centrarase non só nas figuras máis recoñecidas, senón que  atenderá tamén ás autoras de culto e ás circunstancias de produción cultural e recepción social que condicionaron a presenza dunhas e  doutras.

O crítico de cinema Diego Salgado será o encargado de impartir esta clase maxistral. Salgado é autor de Supernovas: Una historia feminista de la ciencia ficción audiovisual xunto a Elisa McCausland, con quen presenta tamén o podcast Trincheras de la cultura pop. Colabora, ademais, en medios como Cine Divergente, Détour ou Dirigido por, e é membro da Film Critics Society.

CONVERSA. A MÚSICA E A MONTAXE EN ROMERÍA

SÁBADO 6 ÁS 18:30 H. SALA MULTIUSOS

Gaspar Broullón, produtor e montador, moderará esta conversa entre Ana Pffaf (montadora) e Ernest Pipó (compositor). Música e montaxe son dous elementos fundamentais na constitución do ritmo dun filme, e a súa correcta conxunción sendo moitas veces parte fundamental da súa proposta estética e narrativa. Durante o encontro, ambos profesionais reflexionarán sobre os procesos de traballo conxunto no filme Romería (Carla Simón), dialogando co público sobre a importancia das sinerxias entre ambas disciplinas. 

Ana Pfaff focalizou ata o momento o seu traballo como montadora no cinema independente. Ten traballado con cineastas como Chema García Ibarra, Victor Iriarte ou Clara Roquet. Moitas das películas montadas por Pfaff percorreron con éxito os festivais internacionais, destacando o Oso de Ouro en Berlín de Alcarràs (2022) ou a estrea na Sección Oficial de Cannes da propia Romería. O seu traballo de montaxe foi recoñecido con dous Premios Gaudí e outras tantas candidaturas aos Goya. Como realizadora, forma parte do colectivo Dostopos xunto á montadora Ariadna Ribas.

Ernest Pipó é un compositor asentado en Barcelona. Empeza a súa carreira musical como guitarrista de música xeralmente instrumental e improvisada. Achégase á música de tradición escrita e ao piano mediante a súa aproximación ao mundo do cinema; nese ámbito, asinou as partituras da longametraxe Estiu 1993 (2017) e da curtametraxe Después también (2019), anteriores traballos da directora Carla Simón.

O moderador deste encontro, Gaspar Broullón, é un produtor, montador e realizador galego con máis de 20 anos de experiencia. Recibiu en catro ocasións o premio Mestre Mateo á Mellor Montaxe polo seu traballo nas series Hierro (2019-2022) e Rapa (2022-2024), e traballou como produtor executivo en filmes como O Corpo Aberto (Ánxeles Huerta, 2022) ou Eroski-Paraíso (Jorge Coira e Xesús Ron, 2019). Na actualidade é profesor na Universidade de Santiago de Compostela e na Universidade da Coruña e vicepresidente no Clúster Audiovisual Galego.

ANÁLISE FÍLMICA. DAVID LYNCH VISTO COS OUVIDOS

SÁBADO 6 ÁS 20:30H. AUDITORIO

O cinema do recoñecido director David Lynch será o protagonista desta charla onde analizaremos a importancia da música e do son nos seus filmes. Ambos elementos forman parte fundamental do universo estético do director, da súa dramaturxia e da súa narración, convertendo os seus filmes nunha experiencia única. 

Comentaranse globalmente algúns dos seus filmes máis representativos e particularmente algunhas escenas, procedentes de clásicos lynchianos como The Elephant Man (1980), Blue Velvet (1986), Twin Peaks (1990) ou Mulholland Drive (2001), entre outras. O encontro pecharase coa proxección de The Grandmother (1970), unha das primeiras curtas dirixidas polo cineasta.

O responsable desta análise fílmica será Conrado Xalabarder, especialista en música de cine e creador da web centrada en música cinematográfica MundoBSO. Xalabarder escribiu en publicacións como Fotogramas, o Periódico de Catalunya ou a revista da Academia das Artes e das Ciencias Cinematográficas de España. É ademais profesor de Bandas Sonoras en universidades como a Universitat de Vic ou a Pompeu Fabra, e colabora como asesor musical en filmes e outros proxectos audiovisuais.

COLOQUIOS CON CINEASTAS

DOMINGO 7 ÁS 21:30H E DO LUNS 8 AO SÁBADO 13 ÁS 20:30H. SALA AMALIA DOMÍNGUEZ BÚA

Complementando a primeira proxección da Sección oficial e a Sección GZ_00 as autoras e autores das obras visionadas participarán nun encontro co público. Eses coloquios comezarán o domingo 7 ás 21:30h coas e cos cineastas da Sección GZ_00, e continuarán entre o luns 8 e o sábado 13 ás 20:30h cos equipos das curtas seleccionadas na Sección oficial.

Os coloquios estarán abertos ao público, brindando a oportunidade de coñecer a perspectiva das directoras e directores, que falarán das súas obras e dos seus procesos creativos. Estes encontros ofrecen aos espectadores a oportunidade de dialogar coas e cos cineastas, enriquecendo así a súa experiencia no festival. Os coloquios retransmitiranse por streaming e estarán dispoñibles en liña ao longo de toda a semana de cara a facilitar o acceso ás persoas que asistan á sesión das 21:30H.

ENCONTRO CON ANXOS FAZÁNS

MÉRCORES 10 ÁS 17:30H. SALA AMALIA DOMÍNGUEZ BÚA

Anxos Fazáns, gañadora do premio á Mellor Curtametraxe Galega no FICBUEU 2024 por Habitar, achegaranos ao proceso creativo do seu novo filme, As liñas discontinuas, que se poderá ver proximamente nas salas de cinema.

As liñas discontinuas é unha historia sobre a conexión humana e a amizade. Bea é unha muller de 50 anos que se está separando do seu marido. O día en que ten que abandonar o fogar no que viviu os últimos vinte anos, chega á súa casa e atopa todo patas arriba e a un dos ladróns durmido na súa cama. Denís é un mozo de 28 anos que, a pesar de ter estudado unha carreira, loita coa precariedade laboral e a falta de oportunidades. Logo de pasar tres días xuntos, cada un deberá continuar o seu camiño. Cando retoman as súas vidas, xa non son os mesmos.

CRÍTICAS CINEMATOGRÁFICAS

DO LUNS 8 AO SÁBADO 13

Coa finalidade de fomentar a reflexión e afondar nos filmes proxectados, ofrecemos ao público asistente ás proxeccións da Sección oficial un pequeno caderno con análises críticas dos filmes incluídos en cada sesión. Esta publicación, que será distribuída en formato físico e dixital, busca aportar ao público do FICBUEU outro punto de vista na percepción dos filmes, afastándose da opinión e da emoción subxectiva para achegarse máis obxectivamente á proposta artística de cada un deles.

Estes textos correrán a cargo de Xavier Montoriol, graduado en Linguas e literaturas modernas pola UB, mestrado de Estudos Comparativos de Literatura, Arte e Pensamento na UPF e de Comisariado Audiovisual na EQZE. É cofundador de Muelle5 e escribe regularmente para outros medios de crítica cinematográfica, tendo textos publicados en Outskirts, A pala de Walsh ou Otros Cines Europa.

LUDOTECA FICBUEU

DO LUNS 8 AO SÁBADO 13. SALA MULTIUSOS

Continuando co noso compromiso coa igualdade e a conciliación familiar, o FICBUEU 2025 contará, un ano máis, con servizo de ludoteca para facilitar a asistencia de nais e pais ás proxeccións e actividades. 

A Ludoteca FICBUEU ubicarase no primeiro andar do Centro Social do Mar e será un espazo destinado a crianzas de entre tres e doce anos. Nela, a rapazada poderá realizar distintas actividades relacionadas co cinema, ao tempo que desenvolven as súas habilidades sociais nun entorno lúdico. Cada xornada contará cun obradoiro realizado polas usuarias e usuarios da Asociación Juan XXIII.

A Ludoteca FICBUEU estará dispoñible entre o luns 8 e o sábado 13, facendo posible que nais e pais poidan gozar de todas as sesións programadas dentro da Sección Oficial.

Horario:

Do luns 8 ao venres 12: de 18:30 a 21:30 horas

Sábado 13: de 16:30 a 21:30 horas

Esta iniciativa conta coa colaboración da Consellería de Política Social e Igualdade da Xunta de Galicia a través do Plan Corresponsables, Ministerio de Igualdad.

PRESENTACIÓN DO CADERNO FICBUEU #6. O DESTINO COMO FORMA. IMAXES DO EXILIO / EXILIOS DA IMAXE

SÁBADO 13 ÁS 11:00H. SALA AMALIA DOMÍNGUEZ BÚA

O Caderno FICBUEU #6, analiza, en diálogo cos cinco títulos que conforman a retrospectiva,  a relación existente entre o concepto de exilio e o mundo da imaxe audiovisual. Este ensaio constrúese afondando nos procesos de  busca e reflexión de dúas mulleres poetas e creadoras, a actriz María Luisa Elío e a filósofa María Zambrano. Ao mesmo tempo, analiza a forma en que determinadas autoras e autores asumen o proceso creativo, esencialmente, como unha vivencia. As súas obras, por esta mesma razón, parecen converterse, por momentos, nunha especie de “artefactos temporais” onde conflúen (e se confunden) a súa vida e obra; as súas identidades, o seu pasado ou a súa memoria co seu destino.

O autor do Caderno FICBUEU #6  é José Manuel Mouriño, investigador, docente, ensaísta e cineasta. Doutor en Belas Artes, Mouriño ten comisariado exposicións e realizado investigacións e escritos sobre autores como Mijaíl Romm, Andréi Tarkovski, Norman McLaren ou Pier Paolo Pasolini, entre moitos outros. 

A presentación contará coa presenza de Diego García, fillo de Jomí García Ascot, director dun dos filmes que conforma a Sección retrospectiva, Remedios Varo 1913-1963 (1967); e Valentín García Gómez, responsable da Secretaría Xeral de Política Lingüística, que apoia un ano máis a publicación do caderno.

ENTREGA DE PREMIOS FICBUEU 2025

SÁBADO 13 ÁS 23:00H. SALA MULTIUSOS

O palmarés da 18ª edición do FICBUEU será anunciado na cerimonia de entrega de premios que terá lugar ao remate das proxeccións das seccións competitivas. O acto, aberto ao público, contará coa presenza de cineastas, integrantes dos distintos xurados así como representantes das institucións e empresas que apoian o evento. 

O acto contará con música en directo a cargo de André Soaxe e Martiño Malleiro Díaz.

GALA ESCOLAS GALEGAS

SÁBADO 20 ÁS 11:00H. AUDITORIO.

As curtametraxes realizadas nos centros de ensino serán as protagonistas desta cerimonia onde se proxectarán as obras finalistas da Sección centros de ensino e se entregarán os  galardóns ás obras gañadoras das Categorías Educación Especial, Infantil e Primaria e Educación Secundaria.

A gala, que conta co apoio da editorial Kalandraka, estará conducida pola escritora e editora Olalla González, acompañada polo artista plástico Marc Taeger, quen realizará debuxo e animación ao vivo.

O acto contará con música en directo a cargo de Martín, Carmen e Juan Sánchez Paz. 

ESPECTÁCULO. A FEIRA DAS ILUSIÓNS

SÁBADO 20 DE 12:00 A 13:30H E DE 16:30 A 18:00H. EXTERIORES DO CENTRO SOCIAL DO MAR

A orixe do cinema é o fío condutor desta instalación artística, un espazo expositivo no que a través de zootropos, praxinoscopios e demais inventos descubriremos como xorderon as imaxes en movemento. 

A feira das ilusións é unha instalación teatralizada a modo de feira ambulante de enxeños ambientada no século XIX. O espectáculo,  organizado pola agrupación burgalesa Errabundo Pelele, ofrece un paseo pola historia dos xoguetes ópticos e as ilusións visuais que deron lugar ao nacemento do cinema.

O público poderá acceder de balde á instalación para coñecer á familia Reynaud, uns feirantes vidos do pasado, que realizarán unha visita guiada pola mostra.  A compañía Errabundo Pelele realizará entre as 12:00h e as 13:30h e as 16:30h e as 18:00h varios pases de aproximadamente 15 minutos deste espectáculo teatralizado.

RUTA DAS TAPAS 5 ESTRELAS

Un ano máis, presentamos, en colaboración con diferentes locais de hostalaría de Bueu, a Ruta das Tapas 5 Estrelas, iniciativa que pretende fusionar o cinema e a gastronomía. Dende o venres 5 e ata o domingo 14, o público poderá achegarse a diferentes locais da vila e degustar propostas gastronómicas inspiradas no mundo do cinema.

Este ano, os establecementos participantes son Esmorga, Volver, Pyramis, Noite Tapas, Casa Quintela, A Taberna de Casa Videira e Tiembla, Maruxa.

Máis información en https://www.ficbueu.com/rutatapas/

CANLE FICBUEU

Coa finalidade de seguir engrosando o arquivo audiovisual do festival e de que as gravacións realizadas durante o evento queden a disposición do público para a súa posterior consulta, volveranse retransmitir por streaming distintas actividades para ser publicadas logo na Canle FICBUEU en YouTube.

A través da nosa canle de Twitch, poderanse ver en directo todos os coloquios con cineastas, as actividades que conforman as  Xornadas Cinematográficas, a presentación do Caderno FICBUEU #6, a Entrega de premios e a Gala Escolas Galegas.

DOAZÓNS

Un ano máis colaboraremos co Banco de Alimentos de Vigo/Pontevedra para levar a cabo unha recollida de produtos de alimentación, hixiene e xestión menstrual.

As caixas de recollida estarán dispoñibles durante todo o festival na entrada do auditorio do Centro Social do Mar.