Actividades

CONCERTO. CHUS PAZOS ENSEMBLE

VENRES 4 ÁS 20:00 H. EXTERIORES DO CENTRO DOCIAL DO MAR

A agrupación musical Chus Pazos Ensemble será a encargada de inaugurar a 19ª edición do FICBUEU. Chus Pazos é un dos baterías de referencia da escena do jazz galego, cunha traxectoria de máis de vinte anos sobre os escenarios. No FICBUEU presenta un concerto en formato trío xunto a dous acompañantes de luxo: Álex Touceda ao contrabaixo e Dani Font á guitarra. O repertorio combinará composicións orixinais con grandes estándares do jazz americano, nunha proposta que transita entre a tradición e a creación contemporánea.

APERTURA E PROXECCIÓN DE LA JETÉE DE CHRIS MARKER

VENRES 4 ÁS 21:00 H. AUDITORIO

MESA REDONDA. LÍMITES, POTENCIAIS E PARADOXOS DA REPRESENTACIÓN NO CINEMA CONTEMPORÁNEO

SÁBADO 5 ÁS 10:30 H. SALA MULTIUSOS

Que ocorre cando unha cámara elixe que mostrar e que deixar fóra de plano? Quen decide como se representa a un pobo, a un líder, a un movemento? Oriol Erausquin, Ricci Galiano e Layla Martínez explorarán as trampas e potenciais da imaxe cinematográfica a través de dous casos concretos. O primeiro: a representación do pobo palestino. O enfoque humanitario dominante, centrado na figura da vítima, tende a invisibilizar a súa resistencia ou a convertila en algo incómodo, cando non directamente criminalizala. 

O segundo: a figura de Trump e a extrema dereita contemporánea. A sátira política atopou nel un filón, pero, que se perde cando o reducimos á súa caricatura? Axuda realmente a entender o fenómeno, ou máis ben trivializa e deixa na sombra os intereses económicos e as estruturas de poder que explican o seu ascenso ao poder e o xiro fascista? E, nese retrato da extrema dereita, que lugar ocupa a resistencia organizada? 

Esta conversa pretende reivindicar que pensar a representación non é un exercicio estético, senón unha cuestión profundamente política: decidir onde poñemos o foco é tamén un exercicio de poder sobre o que reflexionar, cuestionar e confrontar. 

Layla Martínez é editora e escritora. Publicou o ensaio Utopía no es una isla (2020) e a novela Carcoma (2021). Actualmente atópase escribindo o seu primeiro guión e corrixindo a súa segunda novela.

Oriol Erausquin é graduado en Filosofía, Política e Economía e autor de La Rabia es Nuestra (2025). A súa actividade pública abarca o activismo, a comunicacións dixital e a produción cultural. Actualmente está terminando a súa tese doutoral en socioloxía sobre as teorías conspirativas de extrema dereita. 

Ricci Galiano está formado en dirección de escena e teatro contemporáneo pola Real Escola Superior de Arte Dramática e a Royal Central School of Speech and Drama. Investiga sobre o papel da arte e a cultura como mediacións políticas, combinándoo coa loita queer e o movemento de solidariedade con Palestina e o anti-imperialismo.

CLASE MAXISTRAL. AUTOCENSURA E CANCELACIÓN NO CINEMA

SÁBADO 5 ÁS 12:30 H. SALA MULTIUSOS.

Quen pode rodar que? Quen pode interpretar a quen? Nesta conferencia examínase como a cultura da cancelación, a representación identitaria e a autocensura modifican e inflúen na creación cinematográfica. Desde os algoritmos de diversidade nos guións ata o casting de ADN, con exemplos como a polémica de A Odisea de Nolan, a sesión analiza estes fenómenos á luz dos pensadores que mellor os describiron, con Pier Paolo Pasolini como fío condutor e abordando a problemática que pode derivar da homologación cultural. 

Antonio José Navarro é un crítico de cine español. Ao longo da súa carreira colaborou con múltiples revistas e programas especializados en cine, como o programa radiofónico Parlem de Cinema, ou as revistas Dirigido Por, Imágenes de actualidad, Quatermass ou Nosferatu. Ademais, traballou como programador no Festival Internacional de Cinema de Catalunya-Sitges, colaborou na preparación de ciclos na Filmoteca de la Generalitat de Cataluña, a Filmoteca Vasca e a Filmoteca da Generalitat Valenciana e exerceu como docente en diversas universidades españolas. Entre as súas publicacións destacan os libros Alien / Los inconquistables (1995), El imperio del miedo. El cine de horror norteamericano post 11-S (2016) e Choque de titanes. 50 películas fundamentales sobre la Guerra Fría (2017).

CLASE MAXISTRAL. FRONTEIRAS DIFUSAS: A INDUSTRIA E AS SÚAS MARXES

SÁBADO 5 ÁS 16:30 H. SALA MULTIUSOS

MESA REDONDA. COLONIZACIÓN AUDIOVISUAL E RESISTENCIA PERFORMATIVA NO CINEMA CONTEMPORÁNEO

SÁBADO 5 ÁS 18:30 H. SALA MULTIUSOS

Conversa entre Álvaro Peña, Yago Paris, Pepa Llausás e Ariadna Cordal sobre a colonización audiovisual. O debate explorará o fracaso da combatividade e a resistencia aos focos de opresión e marxinalización das novas autorías fronte ao cine combativo dos 60 e 70 ou as cinematografías marxinais que eclosionaron nos anos 90 e 2000 grazas a internet e os novos formatos físicos. Centrándose nas estruturas formais e narrativas que atravesan a produción audiovisual contemporánea, cuestionarase en que medida as novas creadoras e creadores poden chegar a colaborar tacitamente cos poderes aos que din resistirse.

Yago Paris é docente postdoutoral no Departamento de Artes e Humanidades da Universidad Rey Juan Carlos de Madrid e exerce como crítico en revistas como Cine Divergente (da que é cocoordinador) e El Antepenúltimo Mohicano, creou o pódcast Críticas Sobre La Marcha e coeditou o libro Lo que nunca volverá: la infancia en el cine (2022). 

Álvaro Peña, licenciado en Estudos de Asia Oriental, é cocoordinador de Cine Divergente. Participou en publicacións como  La paranoia contemporánea. El cine en la sociedad del control (2019), Lo que nunca volverá: la infancia en el cine (2022), ou Blade Runner: Siguen soñanado los androides (2023), e coordinou diferentes libros sobre cine, como El legado de Akira Kurosawa (2018). Ademais fundou a revista en liña Cosas de Cine e o pódcast Perros Verdes. 

Pepa Llausás é analista de narrativas, escritora e ensaísta, e centrou a súa carreira no estudo e ensinanza de guión e actualmente na investigación de estruturas narrativas e imaxinarios colectivos. Creou a teoría da Narrasis e dirixe Calma Gris, selo editorial e pódcast de análise cultural.  

Ariadna Cordal é directora, montadora e investigadora, formada en montaxe audiovisual e doutora pola Universitat Pompeu Fabra. No campo da dirección, realizou curtas como They Ponder (2017), Papá por que quitas a música (2019) e O patio (2024).

PROXECCIÓN. LES RENDEZ-VOUS D’ANNA, DE CHANTAL AKERMAN

SÁBADO 5 ÁS 20:30 H. AUDITORIO

PRESENTACIÓN DO CADERNO FICBUEU #7. A CURTAMETRAXE: TERREO DE EXPERIMENTACIÓN E VANGARDA DA CIENCIA FICCIÓN

DOMINGO 6 ÁS 11:00 H. SALA AMALIA DOMÍNGUEZ BÚA.

COLOQUIOS CON CINEASTAS

DOMINGO 6 ÁS 21:30 H E DO LUNS 7 AO SÁBADO 12 ÁS 20:30 H. SALA AMALIA DOMÍNGUEZ BÚA

Co obxectivo de complementar as proxeccións da Sección Oficial e da Sección GZ_00, as autoras e autores das curtametraxes proxectadas participarán en encontros co público. O primeiro deses coloquios será o domingo 6 ás 21:30 H coas e cos cineastas da Sección GZ_00, e continuarán entre o luns 7 e o sábado 12 ás 20:30 H cos equipos dos filmes seleccionados na Sección Oficial. 

Os coloquios con cineastas son unha actividade aberta ao público que busca ofrecer un espazo onde coñecer a perspectiva das directoras e directores, que falarán das súas obras e procesos creativos. Permitirán establecer un diálogo entre as persoas asistentes que se queiran achegar e as e os cineastas, enriquecendo así a experiencia do público no festival.

Os coloquios retransmitiranse por streaming e estarán dispoñibles en liña ao longo de toda a semana para facilitar o acceso ás persoas que asistan á sesión das 21:30 H.

CRÍTICAS CINEMATOGRÁFICAS

DO LUNS 7 AO SÁBADO 12

Coincidindo coa vontade do festival de fomentar a reflexión e afondar nos filmes proxectados, ofrecemos ao público asistente ás proxeccións da Sección Oficial un pequeno folleto con análises críticas dos filmes incluídos en cada sesión. A publicación, distribuída tanto en formato físico coma dixital, busca achegar ao público do FICBUEU outro punto de vista na percepción dos filmes, dun xeito máis afastado da opinión e da emoción inmediata e máis próximo a unha reflexión pausada sobre cada proposta.

Estes textos correrán a cargo de Xavier Montoriol, graduado en Linguas e Literaturas Modernas pola Universitat de Barcelona, mestrado de Estudos Comparativos de Literatura, Arte e Pensamento na Universitat Pompeu Fabra e de Comisariado Audiovisual na Elías Querejeta Zine Eskola. É cofundador de Muelle5 e escribe regularmente para outros medios de crítica cinematográfica, tendo textos publicados en Outskirts, A pala de Walsh ou Otros Cines Europa.

ENTREGA DE PREMIOS FICBUEU 2026

SÁBADO 12 ÁS 23:00 H. SALA MULTIUSOS

O sábado 12, ao finalizar as proxeccións de todas as seccións competitivas, anunciarase o palmarés da 19ª edición do FICBUEU na cerimonia de entrega de premios. Tratarase dun acto aberto ao público que contará coa presenza de cineastas, integrantes dos distintos xurados e  representantes das institucións e empresas que apoian o evento.

O acto contará con música en directo a cargo de André Soaxe e Martiño Malleiro Díaz.

PROXECCIÓN PALMARÉS FICBUEU 2026

DOMINGO 13 ÁS 18:30 H. AUDITORIO

Ao día seguinte de anunciar o palmarés da 19º edición proxectaranse nunha sesión especial as curtas premiadas nas diferentes seccións que conforman o festival, co fin de recuperar ditas películas para quen non puidese velas nas súas respectivas sesións.

GALA ESCOLAS GALEGAS

SÁBADO 19 ÁS 11:00 H. AUDITORIO

Cerimonia de entrega de premios na que se proxectarán as curtametraxes da Sección centros de ensino e se entregarán os galardóns ás obras gañadoras das Categorías Educación Especial, Infantil e Primaria e Educación Secundaria.

Organizada co apoio da editorial Kalandraka, a gala estará conducida pola escritora e editora Olalla González, acompañada polos debuxos e a animación ao vivo do artista plástico Marc Taeger.

O acto contará con música en directo a cargo de Martín, Carmen e Juan Sánchez Paz.

OBRADOIRO. CARTELERÍA DE CINEMA

SÁBADO 19 ÁS 11:00 H, 12:00 H E 16:00 H. EXTERIORES DO CENTRO SOCIAL DO MAR

A imprenta ambulante Alouette Machine ensinaranos como se facían os carteis antigamente, empregando a técnica da imprenta tipográfica. Letras, imaxes, tintas, papel, prensas, todo a punto para elaborar de xeito colectivo carteis cinematográficos, xogando cos elementos gráficos.

O público poderá acceder de balde á instalación para visitar a mostra de carteis e coñecer os métodos de imprenta. A compañía Alouette Machine guiará aos asistentes en obradoiros organizados en tres quendas: ás 11:00 H e 12:00 H para rapazada de 5 a 12 anos, e ás 16:00 H de 12 a 18 anos. Para asistir ao obradoiro será necesaria a inscrición previa por correo electrónico á dirección mariarey@ficbueu.com.

CONCERTO. PAKOLAS

SÁBADO 19 ÁS 17:00 H. EXTERIORES DO CENTRO SOCIAL DO MAR

Antes da proxección da Sección Curtas en Familia, o músico Pakolas ofrecerá o espectáculo de rock infantil e familiar As máis molonas! ás portas do Centro Social do Mar. Pakolas guiaranos por todo un universo musical coa súa forza interpretativa e o seu humor, facendo participar ás nenas e nenos co seu estilo rockeiro que entusiasma ao público infantil. Un espectáculo para aprender e para compartir coas máis pequenas e coa familia. 

Pakolas leva cantando, tocando e compoñendo para o público cativo dende hai máis de 20 anos. Formou parte de bandas como Mamá Cabra e A Gramola Gominola. A súa carreira en solitario comezou en 2015, e ten publicados varios libros-CD.

LUDOTECA FICBUEU

DO LUNS 7 AO SÁBADO 12. SALA MULTIUSOS

Continuando co noso compromiso coa igualdade e a conciliación familiar, o FICBUEU 2026 contará, un ano máis, con servizo de ludoteca para facilitar a asistencia de nais e pais ás proxeccións e actividades. 

A Ludoteca FICBUEU ubicarase no primeiro andar do Centro Social do Mar e será un espazo destinado a crianzas de entre tres e doce anos. Nela, a rapazada poderá realizar distintas actividades relacionadas co cinema, ao tempo que desenvolven as súas habilidades sociais nun entorno lúdico. Cada xornada contará cun obradoiro realizado polas usuarias e usuarios da Asociación Juan XXIII.

A Ludoteca FICBUEU estará dispoñible entre o luns 7 e o sábado 12, facendo posible que nais e pais poidan gozar de todas as sesións programadas dentro da Sección Oficial.

Horario:

Do luns 7 ao sábado 12: de 18:30 a 21:30 horas

Esta iniciativa conta coa colaboración da Consellería de Política Social e Igualdade da Xunta de Galicia a través do Plan Corresponsables, Ministerio de Igualdad.

CANLE FICBUEU

Diversas actividades serán gravadas e retransmitidas en directo a través da Canle de Youtube do FICBUEU, onde quedarán a disposición do público facilitando a súa posterior consulta coa intención de seguir engrosando o arquivo audiovisual do festival. As V Xornadas Cinematográficas, a presentación do Caderno FICBUEU #7, os coloquios con cineastas e a Entrega de premios e a Gala Escolas Galegas serán retransmitidas en directo pola plataforma, onde tamén se aloxarán unha serie de entrevistas con cineastas, xurados e participantes no FICBUEU 2026.

DOAZÓNS

Un ano máis colaboraremos co Banco de Alimentos de Vigo/Pontevedra para levar a cabo unha recollida de produtos de alimentación, hixiene e xestión menstrual.

As caixas de recollida estarán dispoñibles durante todo o festival na entrada do auditorio do Centro Social do Mar.