ACTIVIDADES COS MÁIS VULNERABLES 12/03/2020

A asociación FICBUEU ten en marcha as actividades da súa Área Social nas que colabora CaixaBank, a través da Obra Social ”la Caixa”. No presente curso estase a traballar a través de cinefórums e obradoiros de curtametraxe con colectivos en situación de vulnerabilidade ou en risco de exclusión, como son as persoas maiores, os reclusos e a xente nova con discapacidade ou necesidades especiais. O obxectivo desta liña de acción é que gocen dos efectos beneficiosos do cinema, como ferramenta de aprendizaxe e de cohesión social.

As sesións mensuais de curtas con coloquio posterior realízanse nos centros de día para maiores Pescadoira e Contigo, en Bueu, e mais no Centro Penitenciario A Lama, con internas e internos de diferentes módulos. Procúrase así achegar o cinema a espazos nos que non adoita estar presente, proxectando unha escolma de filmes que pasaron polo Festival Internacional de Curtametraxes de Bueu e sobre os que despois se debate, contribuíndo así a rachar coa rutina e a fomentar o pensamento crítico. A forza do audiovisual permite derrubar muros e trasladar a diferentes lugares ás e aos espectadores, que teñen a oportunidade de achegar o seu punto de vista e compartir experiencias. No caso das persoas maiores, sérvelles asemade para estimular a memoria e o pensamento lóxico, ao tempo que favorece as relacións interpersoais.

No Centro Penitenciario A Lama tamén se leva a cabo un dos tres obradoiros cinematográficos programados, que se imparten ao longo duns catro meses en sesións semanais e que culminan coa gravación dunha curta que se estreará no FICBUEU 2020. O traballo contribúe así mesmo a visibilizar as potencialidades das e dos participantes, que pasan por todas as fases do proceso creativo, con total liberdade para expresarse.

O grupo de reclusos rodará a finais deste mes un documental sobre a vida dun deles, que seleccionaron mediante casting, dándolle así voz a un colectivo a miúdo silenciado e estigmatizado que pode achegar unha nova visión da realidade. Outro dos obradoiros impartiuse no Centro de Educación Especial de Panxón (Nigrán), con alumnado diagnosticado de trastorno grave da conduta que xa se atopa na fase de montaxe da súa curta. Veñen de comezar tamén as formacións con mocidade da Asociación de Pais e Nais de Persoas con Discapacidade do Morrazo (Aspamsim). En ambos os dous casos procúrase facilitar a inclusión destas persoas, ao tempo que desenvolven habilidades psicomotrices e comunicativas.

CINEFÓRUMS NO PRÍNCIPE FELIPE 3/03/2020

A asociación FICBUEU vén de iniciar unha nova liña de acción social en colaboración coa Deputación de Pontevedra para traballar con adolescentes da institución Príncipe Felipe a través do cinema. Desde a pasada semana e ata o mes de maio organizaranse oito sesións de curtametraxes que permitirán debater sobre temas como alimentación saudable, sexualidade, violencia de xénero ou cambio climático con grupos de entre 20 e 30 residentes, con idades comprendidas entre os 14 e os 17 anos principalmente.

As proxeccións están dirixidas ás rapazas e rapaces dos dous centros de acollida infanto-xuvenís, polo que para abordar as catro temáticas se replicará a programación en cada un deles. O primeiro bloque, dedicado aos hábitos alimentarios, xa se desenvolveu o pasado 19 de febreiro no centro Agarimo e mañá mércores terá lugar na Escola Fogar, a partir das 16.30 horas. A través de cinco curtametraxes, trátanse cuestións coma os trastornos alimenticios (La piel fina), a comida caseira (Pour une poignee de girolles), o vexetarianismo e o veganismo (73 cows), a comida lixo (Junk) ou a desigualdade en relación á alimentación e os desperdicios (Ilha das Flores). As e os asistentes ao primeiro cinefórum amosáronse moi interesados e participativos.

O obxectivo desta actividade é levar o cinema a espazos aos que habitualmente non chega, aproveitando a capacidade do audiovisual para fomentar a formación cultural e o pensamento crítico. Ao tempo, promóvese a socialización do colectivo ao que se dirixe, favorecendo a súa inclusión. A aprendizaxe e a reflexión combínanse co tempo de lecer, contribuíndo así aos fins do Centro Príncipe Felipe, como son o benestar social e a integración das e dos menores.

Volver arriba