← Volver

Ambas institucións levan traballando no filme dende xaneiro a través dos obradoiros de cinema da Área Social FICBUEU.

A obra estrearase o 11 de setembro durante a xornada inaugural do festival.

O equipo da Área Social do FICBUEU e a Asociación Juan XXIII de Cangas, centro ocupacional para persoas con discapacidade intelectual, gravaron unha curtametraxe froito dun longo traballo nun dos obradoiros de cinema, que comezou o pasado mes de xaneiro.

Durante estes meses, as usuarias e os usuarios do centro cangués aprenderon todo o relacionado co proceso de creación dunha peza audiovisual, partindo da creación da historia e do guión e pasando por todo o proceso de preparación e de produción anterior á rodaxe.

Porén, só faltaba poñer en práctica todo o aprendido nunha rodaxe que durou unhas nove horas aproximadamente e que contou cunha vintena de persoas de ambas entidades ademais de actrices e actores recoñecidos, coma poden ser Mónica Caamaño ou Lois Soaxe.

Todo o traballo detrás das cámaras foi elaborado por integrantes do centro orixinarios de diferentes vilas de Pontevedra, como son Cangas, Moaña e Bueu, aínda que contaron co apoio das monitoras do Juan XXIII e do equipo do FICBUEU.

A peza, de ficción con temática medioambiental, leva por título ‘A fin do osíxeno’ e foi gravada en distintas localizacións, como son a propia sede da Asociación ou o Castelo do Bosque Encantado de Aldán.

O resultado final, aínda con moito por traballar no apartado de montaxe e posprodución, estrearase durante a xornada inaugural do Festival Internacional de Cinema de Bueu, que terá lugar o 11 de setembro.

Trátase do segundo filme do curso 2021/22 posto en marcha a través dos obradoiros de curtametraxes da Área Social FICBUEU, logo do realizado en conxunto coa Asociación Érguete de Vigo, nunha iniciativa que busca achegar e impulsar o cinema cara aos colectivos e sectores máis afastados da creación audiovisual.

Unha vez estreada, a obra poderá verse na canle de YouTube do festival, onde se atopan un bo número das curtametraxes feitas durante os últimos anos de traballo.

← Volver

Un ano máis o FICBUEU será o encargado da sección ‘Ambienta en curta’.

A proxección terá lugar o 1 de xullo na Praza da Pedreira de Pontevedra.

O Festival Internacional de Cinema de Bueu achegará de novo o formato curto a Ambienta, a Mostra Internacional de Cinema LGBTIQA+ de Pontevedra. Será na sección ‘Ambienta en curta’, na que se poderán ver cinco pezas que amosarán as distintas realidades dos colectivos e que contribuirán á difusión do cinema pola diversidade, obxectivo principal do evento.

A sesión celebrarase na última xornada da mostra, o venres 1 de xullo ás 22:30 horas nun espazo ao aire libre como é a Praza da Pedreira de Pontevedra. Previamente haberá un acto de clausura con música relacionada co cinema a cargo de Palito Dj. A entrada será de balde ata completar o aforo dispoñible.

A programación contará con títulos coñecidos para o público do FICBUEU, xa que dúas das obras que se poderán ver neste ‘Ambienta en curta’ como son “Dustin”, de Naïlla Guiguet, e “Son of Sodom”, de Theo Montoya, participaron na Sección Internacional do 2021, levándose “Dustin” os premios á Mellor Música e a Mellor Son. Os outros títulos que serán proxectados son “Ensom Cowgirl”, de Gina Kippenbroeck, “Victoria”, de Daniel Toledo e “Marlon Brando”, de Vicent Tilanus.

Aínda que o FICBUEU será o encargado de poñer o broche final á Ambienta deste ano o vindeiro 1 de xullo, os diferentes actos da mostra comezarán o 27 de xuño. Deste xeito, a presente edición contará con outras tres seccións de proxeccións.

Por unha banda ‘Ambienta Actual’, unha selección na que se mergulla na sociedade contemporánea e o rumbo da mesma a través das proxeccións dos títulos “A primeira morte de Joana”, de Cristiane Oliveira, e “ÉTÉ 85”, de François Ozon, organizada por Avante LGBT+. 

Por outra, estará a sección ‘Ambienta Doc’, unha proposta realizada coa participación da Cinemateca Pedro Zerolo e que achega filmes documentais que exploran as distintas vías de representación do colectivo, como pode ser a obra de Borja Lynch “Triángulos rosas”.

Por último, tamén haberá unha mirada ao pasado coa ‘Ambienta Clásica’, na que se recuperan títulos importantes que axudan a descubrir a presenza do colectivo na historia do cinema, como pode ser “Tokyo Godfathers” de Satoshi Kon e Shôgo Furuya, e que estará organizada polo Cineclube de Pontevedra.

Ademais das diferentes sesións, a programación da mostra tamén inclúe a presentación dun videoclip realizado por Laura Cadenas Amandi, Enzo Sarmiento e Éric Dopazo, un encontro coa actriz, política e activista trans Carla Antonelli, que tamén presentará o documental “Triángulos rosas”, e un acto musical de clausura a cargo de Palito Dj.

Será o segundo ano que o Concello de Pontevedra leve a cabo a mostra baixo o nome Ambienta, que dende os inicios contou co FICBUEU como unha das súas entidades colaboradoras. Toda a programación do evento poderase consultar na páxina web de Ambienta.gal.

← Volver

Poderán participar todos os centros de ensino de Galicia, dende educación infantil e secundaria ata escolas de imaxe e son e facultades.

O FICBUEU abre o prazo para o envío das curtametraxes que queiran participar na Sección Escolas Galegas, que abrangue todos os centros de ensino da comunidade, dende colexios e institutos ata facultades e escolas de imaxe e son.

A sección conta con tres categorías diferenciadas nas que se premiará unha curta en cada unha delas:

• Mellor Curtametraxe de Escolas de Educación Especial, Infantil e Primaria: trofeo + 150€ en material audiovisual.
• Mellor Curtametraxe de Escolas de Educación Secundaria: trofeo + 150€ en material audiovisual.
• Mellor Curtametraxe de Escolas de Imaxe e Son e Facultades: trofeo + 250€ en formación audiovisual.

O prazo estará aberto ata o próximo 15 de xuño ás 23:59 horas para todas as pezas audiovisuais realizadas durante os cursos escolares 2020/21 e 2021/22, co único requisito de non teren participado coa mesma obra en pasadas edicións do FICBUEU.

A temática das curtametraxes será libre e cada escola poderá presentar tantas obras como desexe. A única esixencia é a de posuír unha copia dixital para a súa proxección e non superar os 20 minutos de duración (incluíndo os créditos).

A inscrición no certame poderá realizarse a través dun formulario en liña na páxina web do FICBUEU. De entre todas as pezas presentadas serán seleccionadas varias finalistas, que serán anunciadas o día 1 de setembro.

Un xurado especializado composto de tres personas vinculadas ao audiovisual e ao ensino, escollerá as curtametraxes gañadoras de cada unha das categorías tendo en conta a participación activa do alumnado en todas as fases de creación (guión, produción, rodaxe, montaxe, etc.), a utilización dos distintos elementos da linguaxe audiovisual (como poden ser a fotografía, o son, a escenografía, etc.), a orixinalidade e a creatividade das propostas e o nivel técnico das pezas tendo en conta a idade dos creadores.

As curtametraxes que resulten galardoadas proxectaranse o venres 23 de setembro durante a Gala Escolas Galegas, na que se entregarán os premios correspondentes aos equipos gañadores de cada categoría.

← Volver

Trátase do terceiro ano no que os principais festivais de cinema de Pontevedra se unen baixo un mesmo selo a través da marca creada pola Deputación de Pontevedra.

Ademais do FICBUEU, o Rías Baixas Film Fest tamén abarca outros sete certames.

A Deputación de Pontevedra presentou a nova edición do Rías Baixas Film Fest, un selo que por terceiro ano consecutivo aglutina aos festivais de cinema da provincia. Esta marca naceu coa intención de dotalos dunha maior proxección e forza, ao mesmo tempo que trata de contribuír á difusión da cultura local e galega, segundo declaracións desde a propia Deputación.

O cartel deste ano presentouse nun acto que tivo lugar nos exteriores da sede da Deputación en Vigo, contando coa presenza de representantes de todos os certames e dalgúns cargos públicos, como foi o caso da presidenta da Deputación, Carmela Silva. Alí, e a través dun vídeo resumo de todos os festivais implicados, déronse a coñecer os nomes e as datas dos diferentes eventos, que comezarán en mayo e rematarán en decembro.

Desta maneira, os primeiros en celebrarse serán o Play-Doc Festival Internacional de Documentais de Tui (do 4 ao 8 de maio) e o Festival de Cans en Porriño (do 18 ao 21). Tras estas dúas primeiras citas, en setembro chegará a quenda do Festival Primavera do Cinema en Vigo (do 6 ao 11), o FICBUEU – Festival Internacional de Cinema de Bueu (do 11 ao 24) e o Galicia Freaky Film Festival de Vigo (entre o 23 de setembro e o 1 de outubro).

No acto tamén interveu Manuel Pena, director do FICBUEU, que destacou a diversidade dos perfís dos festivais da provincia e o carácter das asociacións sen ánimo de lucro que están detrás de cada un, motivado segundo as súas palabras “pola paixón polo cinema e a cultura”. 

Doutra banda, o director do FICBUEU quixo ter unhas palabras para valorar o esforzo de todas e todos os involucrados no mundo da cultura, á vez que destacou “a importancia e a dimensión á que chegaron as programacións dos festivais de cinema”, recalcando que van moito máis alá das proxeccións ao contar con outras iniciativas como talleres ou actividades que fomentan a cultura, sendo ambicioso de cara ao futuro e confiando no crecemento dos diferentes proxectos da zona.

Tras el, tomou a palabra a directora de programación do Festival Primavera do Cinema, Ana Gontad, que quixo poñer en valor non só a sétima arte, senón tamén a importancia dos festivais, máis agora que parece que empezamos a saír da situación sanitaria que o pausou todo hai algo máis de dous anos. 

Gontad tamén lanzou unha alegación a favor da recuperación do espazo libre do cinema en salas, significándoo como “unha vitoria da sensibilidade colectiva” fronte “ás ideoloxías totalitarias, xenófobas, machistas e liberais que desafían a convivencia democrática inclusiva que tanto custou construír”.

Por último, pechou a presentación a presidenta da Deputación de Pontevedra, Carmela Silva, que subiu ao atril na compaña de Victoria Alonso, deputada da área de Cultura. Silva quixo destacar o traballo de todos os festivais participantes, á vez que destacou a riqueza que este tipo de eventos culturais outorga a cada concello e á provincia.

Silva tamén afirmou que “estes festivais permiten que a xente teñan miradas diferentes, xa que o mundo do cinema ten a capacidade de crear novas visións do mundo” e que, á súa vez, estes eventos tradúcense en “esperanza de futuro”, ao comentar que este tipo de celebracións enchen de vida os concellos e achegan a cultura ao pobo.

Tras isto, o acto finalizou cunha breve actuación humorística inspirada no cinema que tivo como protagonista á mesma presidenta, poñendo o punto final á presentación do Rías Baixas Film Fest deste 2022.

← Volver

A nova proposta inclúe tamén un sutil cambio de nome e unha nova tipografía

FICBUEU naceu no ano 2008 coa intención de achegar e de dar a coñecer o mellor do formato curto ao público, crecendo de forma progresiva con cada edición. 11 anos despois, crearíanse a Asociación Cultural Cinematográfica FICBUEU e a Área Social FICBUEU, supoñendo un importante fito na evolución do festival ao fortalecer a súa organización e ampliar as súas actividades durante todo o ano.

Desde os seus inicios, a imaxe orixinal do festival estaba baseada na ánfora romana de San Martiño de Bueu, peza destacada do Museo Massó cargada de simbolismo e moi representativa da zona, converténdose á súa vez no galardón dos premiados.

Este 2022 e a seis meses da 15ª edición, o FICBUEU presenta a súa nova imaxe composta por un cambio de nome, un novo logotipo e unha nova tipografía que reúnen o carácter do festival e o seu contexto.

A pesar de que continuará centrándose nas curtametraxes, o FICBUEU pasará a denominarse Festival Internacional de Cinema de Bueu, abarcando así todas as súas actividades e non só aquelas relacionadas co formato curto.

O novo deseño de logotipo realizado por Uqui Permui aúna a esencia do FICBUEU, dando paso a unha imaxe máis actual vinculada non só ao cinema, senón tamén á xeografía de Bueu a través das súas formas redondeadas.

O logotipo chega ademais acompañado dunha nova tipografía, chamada ‘Isaac Sans’ e creada por Marcos Dopico. Esta nova fonte debe o seu nome a todo un referente artístico da nosa cultura como é Isaac Díaz Pardo e está inspirada na tipografía de Sargadelos e no Laboratorio de Formas de Galicia.

Estes tres cambios renovan por completo a imaxe do festival dando paso á 15ª edición, que se celebrará do 11 ao 24 de setembro e que virá cargada de novidades no programa que se irán desvelando co paso dos meses.

← Volver

A Asociación FICBUEU reanuda as sesións de curtametraxes coas mozas e mozos do Centro Príncipe Felipe de Pontevedra, unha acción da Área Social FICBUEU que comezou no ano 2020 e que tivo que suspenderse por mor das restriccións derivadas da pandemia da COVID-19.

Agora, tras esta parada obrigatoria, a Asociación FICBUEU volve a achegar o cinema e o mundo das curtametraxes á xuventude. Coa séptima arte como ferramenta de traballo, a finalidade desta proposta pasa por axudar a cumprir os obxectivos do centro, que trata de asegurar o benestar social e a correcta integración da mocidade.

O programa recolle, ademáis das feitas ata o momento, outras cinco sesións de proxeccións no centro pontevedrés, que comezarán o día 17 de febreiro e que se prolongarán ata marzo.

Deste xeito e a través do cinema, as mozas e mozos de entre 14 e 17 anos traballarán e debaterán en torno a diversas temáticas importantes para a súa formación e educación, como poden ser a violencia de xénero, a sexualidade ou o clima.

As diferentes sesións están dirixidas ás rapazas e rapaces dos dous centros de acollida do Principe Felipe, a Escola Fogar e o Centro Agarimo. A primeira destas sesións, a do día 17 de febreiro, estará adicada ao clima e será proxectada na Escola Fogar, que tamén contará con sesións os días 3 de marzo (sexualidade) e 17 de marzo (violencia de xénero). Por outra banda, a Asociación FICBUEU traballará co Centro Agarimo os días 24 de febreiro (sexualidade) e 10 de marzo (violencia de xénero).

← Volver

A decimoquinta edición do Festival Internacional de Curtametraxes de Bueu, organizado pola Asociación FICBUEU, abre este xoves 23 de decembro de 2021 o prazo de inscrición para as curtametraxes, que permanecerá aberto ata o 23 de abril de 2022.

A participación está dispoñible para todas as obras estreadas a partir do 1 de xaneiro do 2021, podendo concorrer creadores/as de calquera nacionalidade sempre e cando teñan cumprido 18 anos de idade. Así mesmo, poderán presentarse obras de calquera xénero, cunha duración máxima de 30 minutos.

As inscricións faranse exclusivamente a través da plataforma ShortFilmDepot e terán un custo de 2 euros, alén dos gastos de xestión da propia plataforma.

Entre todas as curtametraxes presentadas, o comité seleccionador confeccionará as habituais seccións que formarán a programación do FICBUEU 2022, e que poderán optar aos diferentes premios, valorados nun total de 5.550 euros.

As bases poden consultarse tanto na pestana de información así coma na plataforma ShortFilmDepot.

En canto á Sección Escolas Galegas terá o seu propio reglamento que será publicado ao longo do do mes de maio.

O FICBUEU 2022 acollerá un ano máis o mellor da produción mundial de curtametraxes, achegando á vila de Bueu unha panorámica completa do último ano. Ademais, celebrará o seu decimoquinto aniversario con novidades importantes na súa programación que se irán desvelando ao longo dos próximos meses.

← Volver

• Huntsville Station fíxose coa Ánfora de Prata, Hysterical girl acadou o Premio do Público e Homeless home foi a mellor galega.

O filme belga Stephanie proclamouse a pasada noite gañador do 14º Festival Internacional de Curtametraxes de Bueu (Pontevedra) ao facerse coa Ánfora de Ouro, dotada con 2.000 euros. O vicealcalde do municipio, Julio Villanueva, foi o encargado de anunciar o galardón, que o director da fita, protagonizada por unha nena ximnasta, agradeceu a través dun vídeo, ao igual que a maioría dos premiados. “A historia de Stephanie é moi pequena e sutil, así que é máis especial saber que atopou o camiño cara os vosos corazóns”, dixo Leonardo van Dijl a través da pantalla.

A Ánfora de Prata, que ascende a 1.000 euros, foi para a estadounidense Huntsville Station, segundo desvelou a presidenta da Deputación de Pontevedra, Carmela Silva, quen quixo dar “grazas ás mulleres e homes que traballan no cinema por permitirnos pensar, soñar, reflexionar e ser persoas críticas” e recoñeceu ademais a valía da cineasta chilena Carolina Astudillo, presente no estrado en representación do xurado internacional, engadindo que “precisamos moitas mulleres que conten historias”. Jamie Meltzer e Chris Filippone, directores deste documental ambientado nunha estación onde os reclusos que saen dun cárcere próximo viven os seus primeiros momentos de liberdade, salientaron o novo significado que adquiriu a curta por mor da pandemia. “O filme pídelle ao público que se sente nun espazo incómodo e que empatice con quen está atravesando esa experiencia, para crear unha conexión”, concluíron.

Unha das espectadoras incondicionais do FICBUEU, Olalla González, foi a responsable de anunciar o agardado Premio do Público, que recaeu sobre a tamén produción estadounidense Hysterical girl, de Kate Novak, que reexamina desde unha óptica feminista o único caso de estudo de Freud sobre unha paciente muller. O Premio R á mellor curtametraxe galega revelouno Borja González, representante da compañía de telecomunicacións, e recaeu sobre a cinta de animación Homeless home, de Alberto Vázquez. Ambos os dous recoñecementos están dotados con 500 euros, ao igual que o Premio á mellor curtametraxe experimental, que o xurado desta sección, representado no evento polo realizador Fon Cortizo, outorgou ao filme mexicano Al motociclista no le cabe la felicidad en el traje, de Gabriel Herrera.

A actriz Cris Iglesias, o director David González e a guionista Araceli Gonda subiron asemade ao escenario como integrantes do xurado nacional no momento de dar a coñecer o Premio á mellor curtametraxe española, xunto co Concelleiro de Cultura. Xosé Leal agradeceu “o esforzo tanto da organización como do persoal municipal” pola súa implicación na preparación do certame, antes de anunciar que a gañadora era Correspondencia, de Dominga Sotomayor e Carla Simón, que recibirán tamén 500 euros e mais un desconto en material audiovisual cortesía da empresa WeLab. Doutra banda, o Premio CREA á mellor dirección, que ascende a 200 euros, recaeu no exipcio Morad Mostafa por What we don’t know about Mariam.

O recoñecemento ao Mellor guión foi para Christoph Lauenstein por People in motion (Alemaña). Bella (Grecia), fíxose co premio a Mellor dirección artística, mentres que Lemongrass girl (Tailandia) obtivo o de Mellor fotografía e Still processing (Canadá) o de Mellor montaxe. As curtas francesas Dustin e Sër bi foron galardoadas pola Mellor música e o Mellor son, respectivamente. A holiday from mourning (Países Baixos/Portugal) recibiu os premios a Mellor maquillaxe e peiteado e Mellor vestiario. No tocante á interpretación, Graham Short foi distinguido co premio a Mellor Actor polo seu papel en Ned & me (Reino Unido). No entanto, o de Mellor Actriz compartírono as tres protagonistas de Sestre (Eslovenia): Mia Skrbinac, Sarah Al Sa-leh e Mina Milovanović.

Como en anteriores edicións, os trofeos deste FICBUEU 2021 foron elaborados por internos do centro penitenciario da Lama, agás no caso dos dous primeiros premios, que consistiron na xa tradicional anforiña creada pola ceramista Sandra Obarrio. A cerimonia de entrega de premios, conducida polo actor César Aldea, e a posterior proxección do filme de peche Sole, puxeron fin a unha xornada final que comezaba coa Gala Escolas Galegas, na que se alzaron cos galardóns o CEIP A Pedra (Bueu), o IES Félix Muriel (Rianxo) e a Facultade de Ciencias Sociais da Universidade de Vigo, amais da realizadora finlandesa Saara Hakkarainen na categoría internacional. A foto no tapiz elaborado pola Asociación Cultural Alfombras de Corpus de Bueu puxo fin a dez intensos días de actividades e proxeccións que contaron co Concello de Bueu, a Deputación de Pontevedra, a Xunta de Galicia e o Ministerio de Cultura como principais financiadores.

← Volver

• Autoridades e cineastas participarán mañá na cerimonia de entrega de premios, onde a presenza internacional será virtual.

Diversos profesionais galegos e doutras autonomías asistirán mañá domingo á Gala de Clausura do 14º Festival Internacional de Curtametraxes de Bueu, mentres que aos convidados internacionais verémolos en vídeo. Membros dos distintos xurados como o director Fon Cortizo, a actriz Cris Iglesias ou a realizadora chilena Carolina Atudillo participarán tamén na cerimonia de entrega de premios, ás 19 horas no Centro Social do Mar. No entanto, a axenda de proxeccións e actividades continúa hoxe e mañá.

A partir das 11 horas celébranse en paralelo o ‘Encontro con Alfonso Agra’ no Punto de Encontro do Festival, onde o actor recibirá o Premio Cinema Galego do FICBUEU 2021, e mais a Mesa Proxecta ‘A comunicación nos festivais de cinema’ no Museo Massó. Media hora máis tarde proxectaranse as Curtas en Familia e ás 12:30 dará comezo o concerto de Marcelo Dobode dentro do ciclo ‘Mergullade’, apoiado pola Secretaría Xeral de Política Lingüística a través do Fondo de proxectos culturais Xacobeo 2021. Ás 17 e ás 19 horas haberá pase dobre da Sección Galicia R, con coloquio posterior coas e cos cineastas, mentres que ás 21 horas se desenvolverá a Sección España e o respectivo debate.

A programación do Minific, destinada ás nenas e nenos, continúa mañá domingo ás 10:30 horas coa Gala Escolas Galegas, na que se entregarán os premios e se verán as obras gañadoras das tres categorías nas que se subdivide esta sección: educación especial, infantil e primaria; educación secundaria, e mais facultades e escolas de imaxe. De seguido, ás 13 horas, desenvolverase a proposta ‘As orixes do cinema’, con imaxes sobre os inicios desta arte ás que o trío Caspervek lles porá música en directo.

Xa pola tarde, ás 17 horas, gozaremos de ‘Dobre extra!’, un espectáculo musical para toda a familia, incluído tamén no programa ‘Mergullade’, onde o ilustrador Marc Taeger debuxará as cancións interpretadas por Paco Nogueiras. Ás 18:15 horas, as versións de Two in the mirror comezarán a soar nos exteriores do auditorio anunciando a recta final do festival, que ademais da cerimonia de entrega de premios inclúe a proxección de Sole, ás 21:30 horas, como filme de peche. O director da fita e membro do xurado internacional, Carlo Sironi, presentará online esta longametraxe sobre a maternidade subrogada.

Previamente, ás 19 horas desenvolverase a Gala de Clausura, na que se entregarán os galardóns ás obras premiadas e volverán proxectarse as gañadoras da Ánfora de Ouro e o Premio do Público. Ademais de cineastas galegos e españois autores das curtas, membros do xurado ou colaboradores do certame, no acto participarán autoridades do Concello de Bueu e da Deputación de Pontevedra, principais institucións financiadoras xunto coa Agadic e o ICAA. Acudirán ademais representantes de varias empresas patrocinadoras, como Gadis, R, Nodosa e diversos establecementos e entidades do Morrazo, cuxo apoio é fundamental. Todos van desfilar ante o tapiz de flores elaborado pola Asociación Cultural Alfombras de Corpus de Bueu.

A cerimonia, que estará conducida polo actor César Aldea, poderá seguirse en streaming e comentarse a través das redes sociais. Pero antes de que chegue o seu gran momento, as e os cineastas están a coñecer a riqueza cultural, natural e gastronómica da nosa zona a través do programa ‘Descubrindo a vila de Bueu’, coa colaboración de Turismo Rías Baixas e Turismo de Galicia, entre outros. Se a pasada fin de semana percorreron Cabo Udra da man de Leucoíña Pasea, hoxe visitarán o Museo Massó e navegarán nas embarcacións tradicionais da asociación Os Galos, mentres que mañá viaxarán á illa de Ons con Nabia.