O FICBUEU naceu co obxectivo de promover a curtametraxe, achegando ás xentes da súa contorna un formato cinematográfico excluído das salas de cinema e circuítos de distribución. Grazas á introdución da Sección Retrospectiva no festival de 2019, a este obxectivo sumouse a posta en valor de curtametraxes que tiveron un importante papel na historia do cinema.

A proxección dos filmes vese complementada coa proxecto Cadernos FICBUEU, que permiten afondar nas obras presentadas e o contexto que as enmarca, contribuíndo deste xeito á historiografía deste formato.

No FICBUEU 2020 foi presentado o proxecto por primeira vez, coa publicación Caderno FICBUEU#1: A Nouvelle Vague a través das súas curtametraxes (1956-1965) e actualmente están dispoñibles para ser consultados en diferentes bibliotecas públicas, así como en institucións relacionadas co cinema de ámbito nacional (Academia Galega do Audiovisual, Cineteca Madrid, ESCAC – Escuela Superior de Cine y Audiovisuales de Cataluña, entre outras) e internacional (Institut Francais, Forum des images, La cinémathèque de Toulouse, entre outras).

Durante a edición de 2021 presentouse o Caderno FICBUEU#2, que afonda nesta ocasión nas curtametraxes realizadas pola National Film Board of Canada, a maior produtora de carácter público do mundo.

Neste FICBUEU 2022 foi presentado o Caderno FICBUEU#3, adicado ao ‘Instituto de Investigaciones y Experiencias Cinematográficas’ (IIEC) e posterior ‘Escuela Oficial de Cinematografía’ (EOC) o primeiro centro de estudos cinematográficos en España, referente indiscutible dende a súa fundación en 1947 ata a súa disolución en 1976.