← Volver

O xoves 22 de xuño o FICBUEU proxectará de balde unha sesión no MARCO de Vigo, centrada no colectivo francés (LA)HORDE. Entrada libre ata completar o espazo.

← Volver

← Volver

← Volver

Corenta centros educativos de toda a xeografía galega beneficiaranse das proxeccións e obradoiros de creación curtametraxe no programa “Cinema con perspectiva” da Consellería de Educación da Xunta de Galicia

Bueu, 11 de abril de 2023 — O Festival de Cinema de Bueu amplía o seu alcance cunha iniciativa da Consellería de Educación para levar obradoiros de creación e proxeccións ás escolas de toda Galiza. Durante os próximos meses, o estudantado de 40 centros educativos diferentes poderán desfrutar dunha experiencia que lles permitirá achegarse ao mundo do cinema.

Baixo o nome “Cinema con perspectiva”, o programa ten como obxectivo fomentar a igualdade, o interese polo cinema e a educación audiovisual entre as e os mozos galegos a través de dous tipos de actividades. 

De cara a traballar e reflexionar sobre a igualdade de xénero e social, realizaranse sesións de proxección de curtametraxes cun posterior coloquio e análise dos filmes, ofrecendo as ferramentas para que as e os estudantes identifiquen valores e comprendan as mensaxes enviadas a través dos filmes, comparando opinións e debatendo sobre o papel da muller na sociedade e as problemáticas existentes neste eido.

Durante os obradoiros, as e os estudantes terán a oportunidade de aprender diferentes aspectos do cinema, como a dirección, a interpretación, a produción ou a edición de películas realizando unha pequena curta para poñer en práctica as ferramentas e conceptos sobre linguaxe cinematográfica que o equipo do FICBUEU achegará. 

A partir da semana que vén a organización dará comezo ao programa que se estenderá ata finais de curso nos centros educativos seleccionados:

O FICBUEU agradece a colaboración e participación de todas as escolas asío como á Consellería de Educación da Xunta de Galicia, no seu compromiso coa educación audiovisual e o fomento da igualdade.

← Volver

O mércores 21 de decembro, o FICBUEU programará de balde dúas sesións no Centro Social do Mar de Bueu, unha para público familiar e outra para o adulto

O mércores 21, solsticio de inverno e día con menos luminosidade, era a data máis sinalada da chamada Saturnalia, unha festividade romana na que se celebraba o fin dos días máis curtos do ano, e que acabou derivando no actual Nadal.

O FICBUEU retoma este decembro unha actividade que xa levara en cabo en anos anteriores e na que propoñen sesións de proxeccións para todas as idades no Centro Social de Bueu. A iniciativa contribúe á difusión do formato curtametraxe e do cinema galego e internacional, sumándose aos obxectivos da campaña “El día más corto” que promove a Coordinadora Nacional del Cortometraje.

As proxeccións, con entrada de balde, realizaránse ás 18:00h (sesión curtas en familia) e ás 20:00h (sesión para personas adultas), incluíndo curtametraxes de todo tipo onde primará o ton humorístico e festivo:

Para asistir ao evento só será preciso retirar o convite no despacho de billetes do Centro Social do Mar que estará aberto unha hora antes do evento.

A organización ofrecerá ademais chocolate quente ao público que presente a súa entrada.

← Volver

A recepción prolongarase ata o 15 de marzo ás 14:00h e os traballos seleccionados proxectaranse no FICBUEU 2023 do 9 ao 23 de setembro

Bueu, 15 de decembro de 2022. O FICBUEU vén de abrir o prazo para a presentación de obras á 16º edición do Festival Internacional de Cinema de Bueu (Pontevedra), que se desenvolverá entre o 9 e o 23 de setembro. As bases, dispoñibles na páxina web do certame, contemplan ata cinco seccións competitivas (sen ter en conta a futura convocatoria para a Sección Escolas Galegas) seguindo a pauta da anterior edición do certame, que se saldou un ano máis cun grande éxito de público.

Ata o 15 de marzo permanecerá aberto o prazo para o envío de curtametraxes, que un ano máis deberá realizarse a través da plataforma Shortfilmdepot cunha taxa de inscrición de 2€. Poderán presentarse traballos de calquera xénero estreados a partir do 1 de xaneiro de 2022, cunha duración que non supere os 30 minutos. En xuño daranse a coñecer as obras seleccionadas, que optarán a máis de 5.500 euros en premios tendo tamén en conta os destinados a centros educativos galegos, para os que se lanzará unha convocatoria específica previsiblemente no mes de maio.

Todos os traballos presentados competirán por entrar nas seccións: Oficial, España, Galicia, Descubertas e Escolas Internacionais, conformando grande parte da programación de proxeccións do e o palmarés do FICBUEU 2023. En paralelo haberá tamén outros cinco apartados non competitivos: Retrospectiva, Curtas en familia, Cativa, Infantil, Xuvenil. Ademais, as e os asistentes votarán in situ para o aclamado Premio do Público.

O obxectivo do Festival Internacional de Cinema de Bueu é contribuír á difusión cinematográfica, non só coa promoción das mellores curtamertaxes realizadas no último ano no ámbito internacional senón tamén levando a cabo actividades relacionadas co cinema máis aló do evento. 

Actualmente a organización está a traballar na configuración dun programa que continúa na liña establecida o ano pasado e que incluirá múltiples actividades de carácter cinematográfico e cultural. A isto engádense diferentes eventos e as accións da Área Social do FICBUEU, que xa comezarán en breve con diferentes colectivos.

Podes consultar as bases do FICBUEU 2023 no apartado de información da web.

← Volver

Severiano Casalderrey, autor del Cuaderno FICBUEU#3, presentará su contenido al público luso

← Volver

Durante a 15ª edición do festival e máis aló do evento a organización leva a cabo diferentes iniciativas relacionadas coa Axenda 2030

Cada ano o equipo traballa na mellora destas medidas e na implantación de novidades que supoñan avances cara a consecución dos ODS

---

Un dos compromisos do Festival Internacional de Cinema de Bueu é o de traballar de cara á consecución dos Obxectivos de Desenvolvemento Sostible, poñendo especial coidado á hora de programar actividades alcanzables para toda a sociedade e que todas as persoas poidan gozar das propostas en igualdade de condicións, sen olvidar aquelas medidas que axudan e promoven a conservación da súa contorna para crear un evento sostible e solidario.

Motivada por estes compromisos, a organización leva varias edicións traballando tendo en conta os obxectivos da Axenda 2030 da ONU, centrándose especialmente en varios deles:

O primeiro é o ODS 2 – Fame 0, realizando por segundo ano, e nesta ocasión durante todo o evento, unha recollida de alimentos xunto co Banco de Alimentos de Vigo/Pontevedra (pertenecente á FESBAL – Federación Española de Bancos de Alimentos). Por outra banda, durante as proxeccións para centros de ensino ambas organizacións desenvolveron unha sesión de sensibilización coa rapazada bueuense. Todas as doazóns obtidas durante as dúas semanas de duración da campaña foron entregadas a Cáritas Bueu, co fin de xerar un impacto cercano.

Do mesmo xeito, tamén se realizaron accións a prol da educación de calidade, o ODS 4, como a celebración da Sección Escolas Galegas, así como diferentes sesións de proxección para centros de ensino que estiveron acompañadas de unidades didácticas, fomentando o audiovisual como un método de aprendizaxe, de creación e de expresión para a mocidade.

No tocante á igualdade de xénero, o ODS 5, o FICBUEU leva varias edicións implementando iniciativas como o uso da linguaxe inclusiva e non discriminatoria, o equilibrio na presenza de profesionais en diferentes ámbitos (xurados, poñentes, docentes, equipo do festival, etc.) ou a colaboración con outros festivais ou institucións que promoven estes valores como o Festival Ambienta – LBTGIQ+ de Pontevedra.

Outro dos principais valores da organización é o de xerar emprego de calidade de maneira estable, o ODS 8,  apostando por un modelo de traballo continuo que non basea a súa contratación na temporalidade e co obxectivo de que os servizos subcontratados sexan de proximidade, traballando con profesionais locais na súa maioría.

Tamén neste senso, a produción e o consumo responsable é outro dos compromisos da organización durante todo o ano continuando coa implantación progresiva dos criterios de economía circular, baseados en reducir, reutilizar e reciclar, seguindo o ODS 12. 

Alén destas iniciativas na edición do 2022, tanto o FICBUEU como o resto de entidades e eventos que forman parte do Pacto Cultura Sustentable, acordaron levar a cabo unha serie de accións concretas: recoñecer e erradicar as barreiras que impiden a accesibilidade universal aos eventos, a eliminación do 100% dos plásticos dun só uso, medir a pegada de CO₂ e a identificacións dos grupos de interese. 

Así, diminuíuse a presenza de plásticos dun só uso colaborando con Agua Local e mellorouse a recollida selectiva de residuos participando no programa Composta Morrazo!, unha iniciativa da Mancomunidade do Morrazo que nesta 15ª edición contribuiu considerablemente á redución do volume xeral de residuos.

Por último, o FICBUEU tamén quixo continuar coas actividades de turismo sustentable de anos anteriores, respetando os ODS 14 e 15, coa creación dun programa para as convidadas e convidados do festival que ten como finalidade poñer en valor os recursos naturais da vila de Bueu. 

Dentro deste, realizaouse unha visita guiada por Cabo Udra, un roteiro guiado pola Illa de Ons, unha degustación de productos galegos de proximidade (prestando especial atención a aqueles provintes do consumo responsable, como os que garante o selo colaborador ‘pescadeRías’), unha visita guiada ao Museo Massó ou a saída pola Ría en embarcacións tradicionais coa Asociación Os Galos.

Accesibilidade para todas e todos

​​Neste FICBUEU 2022 e seguindo a liña marcada en edicións anteriores, fortalecéronse as medidas de accesibilidade a través das seguintes propostas:

Comunicamos nas nosas redes sociais e con suficiente antelación á celebración do festival todo o referente á experiencia de asistencia ao festival dende o punto de vista dunha persoa con necesidades especiais ou mobilidade reducida co fin de facilitar a súa planificación. 

Neste senso, cabe sinalar que por primeira vez a páxina web do festival contou cun botón que facilita o uso de diferentes ferramentas de axuda para consultar os contidos e programación do FICBUEU así como un sistema de venta de entradas tanto online coma presencial, alcanzable e sinxelo para todo o público. 

Por outra banda, o equipo do FICBUEU estivo á disposición das persoas con necesidades especiais para prestar asistencia en calquera situación, ofrecendo acceso e localizacións preferentes. 

Outro dos compromisos da organización foi contar con espazo sen barreiras arquitectónicas, realizando todas as actividades da 15ª edición en localizacións totalmente accesibles para persoas con mobilidade reducida, tendo a súa disposición rampas e elevadores.

Máis aló do evento, favorecer unha cultura accesible é un dos obxectivos clave do traballo que o FICBUEU desenvolve durante todo o ano nas diferentes actividades da súa Área Social entre as que destacan os obradoiros de creación en colaboración con diferentes asociacións e colectivos en risco de exclusión. Nestes programas, as usuarias e usuarios aprenden a realizar unha curtametraxe, pasando por todas as fases do proxecto e utilizando o cinema como unha ferramenta de cohesión social, fomentando a creatividade e o traballo en equipo. As pezas realizadas nestes obradoiros foron estreadas durante a xornada inaugural da 15ª edición do festival, aproveitando a ocasión para dar voz e visibilidade a estas persoas e ao seu traballo.

← Volver

Esta primeira edición estivo centrada no tratamento do tempo no cinema.

O Festival Internacional de Cinema de Bueu puxo en marcha na 15ª edición deste 2022 o novo proxecto das Xornadas Cinematográficas, un espazo de reflexión e pensamento sobre a arte do cinema que reuniu en Bueu a varias e varios profesionais do sector (cineastas, montadoras, críticas ou ensaístas) nunha programación centrada, nesta ocasión, na temporalidade e o papel que esta xoga dentro da linguaxe cinematográfica.

Baixo o nome ‘I Xornadas Cinematográficas: esculpindo o tempo’ leváronse a cabo unha serie de actividades que fixeron que o público asistente e todas aquelas persoas que seguiron o evento vía streaming a través da Canle FICBUEU gozaran dun día para o desfrute das apaixoadas e dos apaixoados do cinema. 

Deste xeito, o encargado de inaugurar o espazo foi o investigador, ensaísta e cineasta José Manuel Mouriño, quen tamén é representante e coordinador na Península Ibérica e en Hispanoamérica do Instituto Internacional Andréi Tarkovski. Mouriño deu unha clase maxistral sobre o tratamento do tempo na obra do cineasta ruso, considerado un dos mestres neste eido dentro da sétima arte.

A xornada matinal pechouse coa conversa entre as críticas cinematográficas de Caimán – Cuadernos de Cine Andrea Morán e Daniela Urzola sobre diferentes obras e cineastas, analizando unha gran variedade de recursos temporais destacados ao longo da historia do cinema.

Durante a tarde celebrouse a mesa redonda en liña sobre o ritmo e as realidades temporais que posibilita a montaxe na que, moderadas por Diana Ramahí, a directora, realizadora e docente chilena Carolina Astudillo, a montadora Ana Pfaff e a cineasta e montadora galega Diana Toucedo falaron dos retos habituais á hora de traballar este aspecto. 

A penúltima actividade tivo como protagonista a un dos cineastas galegos de maior relevancia da actualidade, como é Oliver Laxe, que participou nun encontro co xornalista Ángel Suanzes. Na conversa, Suanzes fixo que Laxe viaxara a través de toda a súa filmografía poñendo especial atención á evolución da maneira na que o director traballou este aspecto da linguaxe cinematográfica en cada cinta.

Por último, para a clausura das I Xornadas Cinematográficas do FICBUEU  proxectouse a obra ‘Zerkalo’ de Andréi Tarkovski, considerada pola crítica como unha das pezas máis representativas do cineasta ruso. De feito, o ensaio ‘Esculpir en el tiempo’ de Tarkovski é o que inspirou o nome desta primeira edición dun novo formato que promete aínda máis cinema nos seguintes anos.

← Volver

Os premios nas Seccións de Educación Especial, Infantil e Primaria e de Secundaria completan a selección de curtas gañadoras.

Trala celebración da Gala Escolas Galegas 2022 do Festival Internacional de Cinema de Bueu completouse o palmarés da 15ª edición, co anuncio das curtas gañadoras nas Seccións de Educación Especial, Infantil e Primaria e de Educación Secundaria. 

O luns anunciáronse as pezas galardoadas na sección de Escolas de Imaxe e Son e Facultades Galegas, levándose ‘Algas Negras’ das rapazas e rapaces do IES Audiovisual de Vigo o premio de 250€ en formación audiovisual e o correspondente trofeo, e na sección de  Escolas de Cinema Internacional, con ‘Yi-Yi’ de Giselle Lin da Lasalle College of Arts conseguindo o diploma de finalista nunha axustada disputa coa obra ‘The fall of Ibis King’ de Mikai Geronimo e Josh O’Caoimh, quenes acadaron unha Mención Especial na categoría.

A sétima celebración da entrega de premios para a mocidade, que contou co apoio de Kalandraka e a Fundación Novas, estivo conducida por Bea Campos e tivo lugar o venres 23 ás 11.30 horas, coa presenza dos centros de ensinanza finalistas. Estes foron o CEIP Plurilingüe San Marcos (Abegondo), o CEIP Do Hío (Cangas), o CEIP Do Carballal (Marín), o CEIP Plurilingüe A Pedra (Bueu) e o CRA Amencer (San Paio) en Educación Especial, Infantil e Primaria, e o IES As Barxas (Moaña), o IES Praia Barraña (Boiro), o CPI Eusebio Lorenzo Baleirón (Dodro), o IES Terra de Trasancos (Narón) e o CPI Alcalde Xosé Pichel (Coristanco) en Educación Secundaria.

Nesta ocasión o acto incluiu as proxeccións de todas as curtametraxes finalistas en cada categoría e, finalmente, fíxose a entrega dos diplomas aos centros participantes e dos galardóns ás pezas gañadoras. Estas foron, segundo o resolto polo Xurado Escolas, ‘Que van dicir de nós’ do CPI Alcalde Xosé Pichel en Educación Secundaria e ‘Carolina e o corvo de ás brancas’ do CEIP do Hío en Educación Especial, Infantil e Primaria, ambos premios compostos por 150€ en material audiovisual e un galardón.

Varias actividades clausuraron o MiniFIC na xornada vespertina

A programación do Minific, destinada ás nenas e nenos, continuou pola tarde con varias actividades para o desfrute de todos os públicos. Ás 16.00 horas na Sala Multiusos tivo lugar un obradoiro de storyboard da man de Gáidil Bueu, no que as e os asistentes puideron transformar en imaxes unha pequena historia, descubrindo o guión gráfico como unha ferramenta á hora de planificar a creación dun film.

Xa ás 17.00 horas nos exteriores do Centro Social do Mar a mocidade puido desfrutar do Consertasso na Horta a cargo do músico Brais das Hortas, posto en marcha grazas ao apoio da Deputación de Pontevedra – Pontegal. No concerto, o carismático artista interpretou a varias personaxes fluíndo nos diferentes estilos musicais e amosando un retrato da sociedade actual dende unha perspectiva humorística. No acto tamén se puido participar nunha degustación de Kombucha por parte de Meraki Ferments. Para rematar a xornada, levouse a cabo a sesión de proxección da Sección Curtas en Familia ás 18.30 horas, na que se visualizaron ata oito pezas internacionais para o público familiar.