O festival arrincará o vindeiro venres coa proxección dos curtos da Asociación FICBUEU, a creación dunha alfombra floral e o concerto do grupo indie Sr. Chinarro

30.08.24. BUEU. A piques de cumprir a maioría de idade (este ano chega á súa décimo séptima edición), o Festival Internacional de Cinema de Bueu, o FICBUEU, preparou un completo programa que inclúe a estrea en España de 15 curtametraxes realizadas por directoras e directores de Canadá, Italia, Suíza, Lituania, Estonia, Líbano, República Checa, Francia, Estados Unidos, Países Baixos, Reino Unido ou Finlandia. Dúas das curtas poderanse ver o domingo 8 de setembro na sección «Descubertas», que reúne media ducia de películas innovadoras e de vangarda. O resto forman parte do cartel da «Sección Oficial», que se desenvolverá en seis bloques de películas entre o luns 9 e o sábado 14. 

O certame comeza o vindeiro venres 6 coa proxección na pantalla do Centro Social do Mar de Bueu de Millonetis, a curta realizada en colaboración coa Fundación Igualarte no marco dos obradoiros da Área Social da Asociación FICBUEU (20.00 horas) e coa elaboración no exterior da alfombra floral da man da Asociación Cunchas e Flores. Despois será a quenda do concerto do grupo indie sevillano Sr. Chinarro (21.30 horas). Todas estas actividades son gratuítas e só será necesario retirar as invitacións -no despacho de billetes en liña ou no despacho de billetes- para asistir ás estreas dos curtos da Asociación FICBUEU.  

A nova edición do certame bueuense foi presentada publicamente hoxe no centro de Bueu coa participación da concelleira de Cultura de Bueu, Carmen García; o presidente de Deputación de Pontevedra, Luis López; o director da Axencia Galega de Industrias Culturais (AGADIC), Jacobo Sutil, e máis as directoras e o director do FICBUEU: Nerea Lores, María Ruiz-Falcó e Manuel Pena. Tamén estiveron presentes o delegado territorial da Xunta en Pontevedra, Agustín Reguera, e mailo deputado provincial de Cultura, Jorge Cubela.

A concelleira Carmen García felicitou á dirección e o equipo do FICBUEU, un festival que, lembrou, «conta co respaldo da veciñanza, incluído o tecido asociativo da vila». Dende a Deputacíon, Luis López lembrou que o organismo provincial incrementou este ano o seu apoio aos festivais da provincia. E destacou a importancia e interese do FICBUEU. O director da AGADIC, Jacobo Sutil, referiuse á calidade da programación do Festival e tamén á súa implantación no territorio e o apoio social. Lembrou, ademais, que dada a importancia que ten «o ecosistema estratéxico de festivais» de Galicia, a Xunta tamén incrementou neste ano «en máis dun 30%» o seu apoio para este tipo de actividades.

Encontro de altura

O FICBUEU adica este ano as súas Xornadas Cinematográficas. É un dos puntos de interese da programación deste ano, tal e como explicou durante a presentación Manuel Pena, co-director do FICBUEU, Analizarase, durante as Xornada, o impacto no cinema, en diferentes momentos da historia, das correntes políticas do momento. 

O programa deste ano inclúe tamén un encontro a tres bandas: o director Rodrigo Cortés (Buried, Red lights ou a aínda por estrear Escape), o novelista Juan Gómez-Jurado (creador da triloxía Reina Roja e do seu protagonista, Antonia Scott) e o guionista, humorista e comunicador Arturo González-Campos charlarán o domingo 8 (12.00 horas) co público sobre a pegada do cambio que supuxo a chegada do son ao cinema. Os tres forman parte dos coñecidos pódcast ´Todopoderosos» e «Aquí hai dragones». Pola tarde, terán un encontro co público nunha firma de libros. 

Un día antes, o sábado 7, desenvolveranse as III Xornadas Cinematográficas.Este espazo de reflexión, que este ano abordará a relación de cinema e política, contará coa masterclass do profesor de Filosofía Política Camil Ungureanu, unha conversación entre as críticas e programadoras Belit Lago e Daniela Urzola, unha mesa redonda en liña con membros do podcast «La escóbula de la Brújula» e un encontro co director Jaime Rosales (Petra, Girasoles silvestres). Ademais, proxectarase a película The Conversation, realizada en 1974 por Francis Ford Coppola e protagonizada por Gene Hackman e John Cazale.

A canteira fórmase en Ons

A Residencia FICBUEU é un claro exemplo do apego ao territorio por parte do festival. Na súa segunda edición, elixiu a catro realizadoras e realizadores de entre 25 e 28 anos para que poidan desenvolver os seus novos proxectos. Un equipo de expertas liderados pola directora e guionista Estibaliz Urresola (a súa ópera prima, 20.000 especies de abellas, proxectada durante a pasada edición do FICBUEU, fíxose con tres Goya) formaraos e asesorará durante unha semana (do 16 ao 23 de outubro) na Illa de Ons. Participan a arxentina Camila Mailén Bóveda, as catalás Ana Calderón e Anna Llargués e o lucense Miguel Casaseca. Unha das catro curtametraxes, ademais, recibirá apoio para a súa produción. O ano pasado o proxecto gañador foi Sismes, de Jordi Sanz. Recibiu un premio de 15.000 euros e foi producido pola produtora galega Nortecatro Cinema e a catalá Shoji Films.

Entre o 16 e o 23 de outubro, e durante unha estadía na Illa, recibirán formación e apoio dun equipo de persoas expertas lideradas pola guionista de «20.000 especies de abellas», Estíbaliz Urresola

28.08.24. BUEU. Teñen entre 25 e 28 anos, están a construír o seu proxecto profesional arredor da creación de historias en soporte audiovisual e cinema, e presentaron interesantes proxectos de guión que foron elixidos para participar na Residencia FICBUEU na Illa de Ons, o proxecto do Festival Internacional de Cinema de Bueu para apoiar o desenvolvemento de curtametraxes. Compartirán as actividades de formación e asesoría, algunhas de carácter individual e outras de xeito grupal, a Residencia FICBUEU, na Illa de Ons, entre o 16 e o 23 de outubro. Unha das curtas, ademais,  recibirá apoio para a súa produción.. 

As participantes seleccionadas este ano son Camila Mailén Bóveda Figueira, nada en Arxentina en 1996; Ana Calderón (Caldes de Malavella, Girona, 1998); Anna Llargués (Barberà del Vallès, Barcelona, 1999), e o lucense Miguel Casaseca (1997). As tres primeiras presentaron á convocatoria guións de curtametraxes do xénero dramático tituladas, respectivamente Área Central, Cotorra e Àvia Peix. Casaseca propón a falsa documental From NASA to Merceditas.

Equipo de formadoras

O equipo formativo estará encabezado pola directora e guionista Estibaliz Urresola coma titora. A súa ópera prima, 20.000 especies de abellas, proxectada durante a pasada edición do FICBUEU, foi galardoada nos Premios Goya deste ano cos premios a Mellor Dirección Novel e Mellor Guión Orixinal. Durante unha semana, a directora alavesa levará a cabo sesións individuais con cada unha das autoras e autores para a revisión das obras e o seu avance.

Ademais das titorías individuais e espazos de de intercambio grupal con Urresola, as e os residentes terán acceso a tres formacións específicas en distintas materias para fortalecer os seus proxectos: Guión con perspectiva de xénero, impartida por Carmen Ávalos; A importancia da coordinación de intimidade nunha rodaxe da man, da man de  Tábata Cerezo e Lucía Delgado, creadoras da empresa especializada IntimAct; e  Primeiros pasos tras a finalización dun guión, impartida por Beli Martínez.

Produción dunha das curtas

Rematado o programa, a organización seleccionará novamente un dos guións participantes para o seu desenvolvemento e produción. Na I edición da Residencia, a do ano pasado, a película elixida para a súa producion foi Sismes, de Jordi Sanz Angrill e co-guionizado xunto a David Junyent.

Sismes conta a historia de Mila, que meses despois da misteriosa partida do seu ex marido, regresa á illa volcánica onde fixeran a súa lúa de mel – que ela gravou cunha cámara de video-. Está obsesionada con gravarse a ela mesma para recrear os supostos contraplanos das imaxes da viaxe nas que só parece o seu ex marido. A protagonista busca así non só revivir o seu pasado, senón unir e manipular estas imaxes de tempos distintos para crear un novo relato, un novo recordo.

O Festival Internacional de Cinema de Bueu volve ofertar diversas prazas de voluntariado para as persoas que desexen apoiar a organización e desenvolvemento da 17ª edición do festival.

As e os voluntarios terán a oportunidade de cooperar cun equipo profesional e vivir o evento desde dentro, aprendendo da experiencia nunha interesante contorna de traballo. As persoas voluntarias poderán participar en variadas tarefas técnicas e loxísticas, sempre baixo supervisión, estarán aseguradas e contarán cun certificado final pola súa colaboración.

O prazo para cubrir o formulario permanecerá aberto ata o 28 de agosto.

Máis información en mariarfalco@ficbueu.com

• O certame buenense adica este ano as súas «Xornadas Cinematógraficas» a reflexionar sobre a pegada do contexto político de cada época no cinema
• Os integrantes dos podcast «Todopoderosos» e «Aquí hai dragones» manterán dous encontros co público o domingo 8 de setembro
• Membros do podcast «La escóbula de la brújula» participarán virtualmente nunha mesa redonda no evento

08.08.24. BUEU. Como impacta no cinema o contexto político no que se fai? Ese é o tema sobre o que tratarán este ano as «Xornadas Cinematográficas» do Festival Internacional de Cinema de Bueu. Celebraranse o sábado 7 de setembro, o primeiro día completo de actividades do FICBUEU na súa edición de 2024. Nesa primeira fin de semana do Festival, o público do evento poderá asistir a coloquios, presentacións de libros ou encontros, físicos e virtuais, cos integrantes de tres dos podcasts sobre cinema e cultura máis seguidos en España.

As «Xornadas Cinematográficas», que o FICBUEU inclúe na súa programación por terceiro ano consecutivo, son un espazo de reflexión e pensamento sobre sobre o cinema. Participan cineastas, ensaístas, ou profesionais de diferentes oficios do sector audiovisual. Cada ano, dedícanse a un tema. Na décimo sétima edición do Festival Internacional de Cinema de Bueu abordarán a relación, as relacións, entre cinema e política. 

«Se realista: fai o imposible!» 

Se realista: fai o imposible! A frase, un dos lemas do movemento estudantil dos anos 60s e acuñada polo filósofo Ernst Bloch, dá título á clase maxistral coa que comenzarán as «Xornadas Cinematográficas». Correrá a cargo de Camil Ungureanu, profesor de Filosofía política da Univesitat Pompeu Fabra de Barcelona. 

Ungureanu ten entre as súas liñas de investigación e reflexión as relacións entre o cinema e a política. E sobre iso impartirá a clase maxistral no FICBUEU. A continuación, as críticas Daniela Urzola e Belit Lago profundarán no tema no seguinte conversatorio das «Xornadas Cinematográficas», titulado Trauma e reconstrución.

Ese mesmo sábado, xa pola tarde, será a quenda dun dos grandes realizadores que participan este ano no FICBUEU. Jaime Rosales manterá un conversatorio co crítico de cinema Xavier Montoriol. Será despois de que parte do equipo do podcast «La escóbula de la brújula» participe nunha mesa redonda virtual cos asistentes ao Festival para falar sobre Arte e propaganda. O cinema de entreguerras.

O domingo, en clave podcast

O realizador Rodrigo Cortés, o escritor Juan Gómez-Jurado e o guionista e comunicador Arturo González Campos integran dous dos podcasts máis interesantes da esfera da cultura en España: «Todopoderosos» e o irreverente «Aquí hay dragones». Tamén coñecidos todos eles polas súas carreiras no cinema, a literatura, ou o audiovisual, respectivamente, volven sumarse ao FICBUEU. Será o domingo 8 de setembro ás 12 horas. Falarán sobre o cambio que supuxo para o cinema e a realización de películas a incorporación do son. Máis tarde, ás 17 horas, asinarán libros nun evento ao que se pode acceder de balde logo de retirar o correspondente convite no despacho de billetes.

González Campos, Cortés e Gómez-Jurado xa participaran en 2018 no Festival Internacional de Cinema de Bueu. A súa presentación, no Centro Social do Mar, no que se realizan todas as actividades presenciais do FICBUEU, rexistrou naquela ocasión un cheo total. A presentación foi moi ben valorada polo público asistente.

A participación de divulgadoras e estudosas da sétima arte e o audiovisual complétaa o encontro que o público do FICBUEU terá coa profesora Nieves Febrer. Ela fixo o Caderno #5 do Festival, que aborda a  figura do creador do cinema experimental estadounidense, Jonas Mekas. Presentarao o sábado 14 de setembro, no que se programa a sección «Retrospectiva», dedicada a Mekas.

A directora executiva do Festival de Tampere, Riina Mikkonen; o director e produtor Chema García Ibarra, e a crítica serbia Tara Karajica, xurado da Sección Oficial do certame.

BUEU. 31.07.24. A actriz galega María Vázquez (Vigo, 1979) recibirá o Premio Cinema Galego do Festival internacional de Cinema de Bueu (FICBUEU). O certame buenense recoñece dende 2016 con este galardón as achegas de profesionais da industria audiovisual de Galicia durante a súa traxectoria. Vázquez recibirá o Premio Cinema Galego o 14 de setembro nun evento no que tamén manterá unha conversa aberta co público do FICBUEU.

O festival, que entre os días 6 e ao 21 de setembro celebra a súa décimo sétima edición, outorgoulle este premio en anos anteriores ás actrices Mabel Rivera, Melania Cruz e Luísa Merelas, e aos actores Miguel de Lira, Alfonso Agra, Antonio Durán Morris e Celso Bugallo.

María Vázquez comezou a súa carreira coma intérprete hai preto de 25 anos. Vencellada profesionalmente tanto ao audiovisual de Galicia coma ao español, estivo nomeada en senllas ocasións aos Premios Goya, a máis recente en 2024 pola súa interpretación no premiado filme galego Matria. Ao longo da súa carreira, Vázquez mereceu ademais tres Premios Mestre Mateo polas súas interpretacións noutras tantas producións. A actriz viguesa tamén participa decote producións de teatro e televisión. O seu traballo mais recente para a pequena pantalla é na serie El jardinero, producida por Netflix e que será estreada nos vendeiros meses.

Durante o encontro co público do FICBUEU que manterá o 14 de setembro, os asistentes poderán achegarse ao percorrido profesional de María Vázquez e afondar nos seus traballos.

Xurado

O equipo do FICBUEU apura nestes días os últimos detalles organizativos da vindeira edición do certame, cuxos xurados para as seccións a concurso, a Oficial e máis Descubertas, que premia as mellores producións das autoras e autores máis novos, xa foron designados.

A directora executiva e programado do Festival de Tampere (Finlandia), Riina Mikkonen; o director, guionista e produtor Chema García Ibarra, e máis a programadora, crítica e xornalista serbia Tara Karajica serán as tres persoas encargadas de decidir os filmes gañadores da Sección Oficial.

Compoñen o xurado de Descubertas a fotógrafa e gestora cultural Elisa Pereira, o programador e investigador Xan Gómez, e a tamén programadora, investigadora e crítica Daniela Urzola.

BUEU. 29.05.2024. Unha das curtametraxes conta a vida de Layla, unha nena que dende o campo de refuxiados no que vive no estranxeiro imaxina a súa Palestina natal. Noutra das curtas, a anciá Oum Amin volve percorrer, de forma virtual, a cidade de Haifa, en Gaza, na que nacera e medrara antes da ocupación israelí. Son os argumentos de dúas das cinco curtametraxes palestinas que o FICBUEU proxecta o xoves 13 de xuño no Centro Social do Mar de Bueu (20.30 horas).

A recadación íntegra será destinada á ONG Medical Aid for Palestinians, que presta axuda sanitaria á poboación da Franxa. As entradas para esta actividade solidaria teñen un prezo de 3 euros. Están á venda na tenda en liña do FICBUEU. Ademais, dende a mesma tenda en liña na que xa están á venda as entradas solidarias, quen así o queira tamén poderá facer un donativo malia que non vaia asistir. Haberá un produto só para donativos: as persoas poderán elixir canto diñeiro doan mercando entradas para apoiar ás vítimas en Gaza aínda que non van asistir á sesión.

O Festival Internacional de Cinema de Bueu (FICBUEU) decidiu, en relación coa invasión de Gaza, excluír na súa vindeira edición calquera filme que obtivese financiación pública de Israel ou de calquera entidade pública ou privada que apoie o xenocidio do pobo palestino. O FICBUEU celebra a súa 17ª edición entre os días 6 e 21 de setembro. Coma cada ano, curtametraxes chegadas dende todo o mundo competirán na súa sección oficial. 

Cinco olladas palestinas

A cooperativa compostelá Numax encargouse da selección das obras, de facilitar a loxística das copias e do subtitulado das curtas ao galego. A escolma fíxose a partir do catálogo de Another Gaze unha plataforma informativa dixital e en papel centrada no cinema e no feminismo que ademais é parte do proxecto polo que o FICUBUEU organiza esta sesión solidaria dende a súa orixe.

Catro das curtas que se proxectarán son producións da última década.  

Road to Palestine (Estrada a Palestina) é de 1985. Realizada por Layaly Badr, conta a vida da nena Layla: chegou ao campo de refuxiados logo de ser ferida nun bombardeo israelí en Gaza no que morreu o seu pai; ela e os seus amigos do campamento imaxinan como será o seu país, que non coñecen.

En The White Elephant (O Elefante Branco, 2018), Shuruq Harb compón o retrato dun adolescente palestino nos anos 90 empregando coma espello a cultura pop israelí. Faino a partir de imaxes compartidas na internet por soldados israelís durante a Guerra do Golfo, da primeira Intifada, ou de reunións de música trance.

Your Father Was Born A 100 Years Old, And So Was The Nakba (O teu pai naceu hai 100 anos, e así era a Nakba (2017), de Razan AlSalah, relata a historia da anciá Oum Amin percorrendo, de forma virtual, a súa Haifa natal. O filme é de 2017.

The Silent Protest: Jerusalem 1929 (A protesta silenciosa: Jerusalén 1929) foi realizada por Mahasen Nasser-Eldin en 2019. Recupera a historia da mobilización protagonizada por 300 mulleres de toda Palestina chegadas a Jersualén en 1929 para protestar contra o Alto Comisionado Británico da época. 

Completa a programación Electrical Gaza (Gaza Eléctrica, 2015). A súa directora, Rosalind Nashashibi, retrata no filme a Franxa de Gaza coma un mito: illada, atemporal, case inaccesible, extremadamente tensa.