Co obxectivo de potenciar a incorporación do audiovisual nas aulas, promovendo o seu uso tanto como ferramenta educativa como creativa, levamos traballando nos centros de ensino galegos desde 2017. Deste xeito, desenvolvemos actividades que inclúen a proxección de audiovisuais e a realización de coloquios para fomentar o espírito crítico no alumnado, así como obradoiros e charlas de carácter divulgativo e didáctico. Nestes encontros, buscamos iniciarlos no coñecemento da linguaxe audiovisual e proporcionarlles ferramentas básicas que faciliten o seu uso como medio de expresión.

Cinema con perspectiva

Desde 2023 levamos a cabo o programa “Cinema con perspectiva”, unha proposta da Consellería de Educación da Xunta de Galicia creada para dotar de recursos os centros educativos públicos de primaria e secundaria obrigatoria. Este proxecto contribúe á consecución da igualdade efectiva e de dereitos entre mulleres e homes, á prevención da violencia de xénero e ao respecto pola diversidade afectivo-sexual.

O proxecto ofrece ao alumnado a oportunidade de participar en obradoiros de creación audiovisual ou de asistir a sesións de proxección seguidas dun coloquio.