CHARLAS DIRECCIÓN DE ARTE / DA CURTA Á LONGA / PRODUCIÓN -
SÁBADO 7 / DOMINGO 8 / SÁBADO 14
PUNTO DE ENCONTRO

As e os amantes da sétima arte teñen nas actividades cinematográficas do FICBUEU o complemento perfecto ás proxeccións que se levarán a cabo durante toda a semana. Tres son as charlas impartidas por profesionais do sector que se desenvolverán con acceso libre e de balde no Punto de Encontro establecido na sala de exposicións Amalia Domínguez Búa.

A dirección de arte no cinema. Sábado 7 – 11:30h. Punto de Encontro.

Elia Robles introducirá na súa clase maxistral a metodoloxía e a importancia da dirección artística, achegando experiencias propias e compartindo co público como enfronta a creación estética de cada novo proxecto. A relatora formou parte do Departamento de Arte do filme La sombra de la ley, recentemente galardoado co Goya á Mellor Dirección Artística, e vén de traballar con Amenábar ou Sánchez Arévalo. Na sesión farase ademais unha breve presentación da longametraxe Ons, na que Elia Robles se encarga deste apartado, para o que tamén contaremos coa presenza de Alfonso Zarauza, director da fita.

Da curta á longa. Domingo 8 – 11:30h. Punto de Encontro.

O realizador Xacio Baño, galardoado co Premio á Mellor Curtametraxe Galega en varias edicións do FICBUEU, explicará a súa evolución desde as curtametraxes ata a longametraxe, un tránsito habitual no eido da dirección cinematográfica. O convidado presentou o pasado ano a súa primeira longa, Trote, no festival de Locarno. No relatorio, dinamizado polo tamén realizador Gaspar Broullón, revisará a súa traxectoria para afondar nas diferenzas á hora de abordar proxectos de diferente metraxe e os retos que lle supuxo mudar de formato.

A produción dunha película. Sábado 14 – 12:30h. Punto de Encontro.

O produtor executivo de Frida Films, Sergio Frade, abordará na súa conferencia o complexo proceso de sacar adiante un proxecto cinematográfico, desde a recepción do guión ata obter a copia final da cinta. O último treito da súa intervención centrarase nas vías para autoproducir unha curta, con especial atención á busca de financiamento. Frida Films aposta polo cinema de autor, con nomes como Nely Reguera, Juanjo Giménez ou Diana Toucedo.