CONCERTOS XOEL LÓPEZ / DE VACAS -
VENRES 7 / SÁBADO 8
CENTRO SOCIAL DO MAR / EXTERIORES DO CSM

O programa cinematográfico do FICBUEU 2018 compleméntase con variadas actividades nas que non podían faltar as actuacións en directo. Xoel López e De Vacas protagonizarán os concertos principais, aínda que a música ao vivo tamén estará presente nas xornadas de inauguración e clausura, na programación infantil ou nos programas de radio.

Concerto de Xoel López. Venres 7 – 22:30h. Centro Social do Mar. Entradas.

Xoel López ofrecerá no FICBUEU un concerto íntimo no que pouco máis de 200 persoas poderán gozar dos seus temas na xornada inaugural do certame. O coruñés, que veu movéndose entre o pop-rock alternativo e o folk clásico, está considerado un dos artistas máis representativos e influentes da nova canción española. Baixo o seudónimo de Deluxe iniciou unha exitosa carreira que, xa co seu nome, lle merecería galardóns coma o premio ao mellor músico independente. Agora preséntanos ‘Sueños y pan’, un disco no que, tras máis de dúas décadas de traxectoria, busca o equilibrio entre a liberdade e a estabilidade.

Concerto de De Vacas. Sábado 8 – 13:00. Exteriores do Centro Social do Mar. De balde.

De Vacas, un dos grupos revelación da escena musical galega, encherá de música ao vivo  as inmediacións do Centro Social do Mar cun divertido directo concerto no que versionarán coñecidos hits venerados polas masas e maltratados pola historia. Desde as Spice Girls ata ao Gangnam Style, pasando por Enrique Iglesias ou o o “Despacito” de Luis Fonsi, cuxa particular versión en galego, “Amodiño”, xa é viral en internet, con medio millón de reproducións. O cuarteto musical formado por unha guitarra e tres fermosas voces, Premio Martín Códax da Música, combina nesta xira os seus clásicos con novo repertorio, así que non faltarán as sorpresas.