O 18º Festival Internacional de Cinema de Bueu celebrarase do 5 ao 20 de setembro de 2025 na localidade de Bueu, e terá como obxectivo a proxección e promoción das mellores curtametraxes realizadas nos dous últimos anos no ámbito internacional.
A participación está aberta a todas as obras estreadas a partir do 1 de xaneiro do 2024, podendo concorrer creadoras e creadores de calquera nacionalidade sempre e cando teñan cumprido 18 anos de idade. Poderán presentarse obras de calquera xénero, cunha duración máxima de 30 minutos (títulos de crédito incluídos). Cada participante poderá presentar tantas obras como desexe. Non serán admitidas as curtametraxes que xa fosen presentadas en edicións anteriores.
XURADO OFICIAL
Beatriz Hernández é unha produtora e xestora cultural licenciada en Comunicación Audiovisual. É actualmente a directora artística do Skyline Benidorm Film Festival, proxecto propio que se realiza en Benidorm dende 2017 co fin de promover o cine na cidade.
Dende xuño de 2022 preside a Coordinadora del Cortometraje Español, asociación que defende a curtametraxe como formato independiente da longametraxe e promove o seu desenvolvemento industrial. Tamén é unha das fundadoras e vicepresidenta de FESCICOM, Asociación de Festivales de Cine de la Comunitat Valenciana.
Como produtora, ten traballado en series como Cosmos, para FOX e National Geographic ou en campañas publicitarias para marcas como Hugo Boss Kids ou FIAT.
Massimo Iannetti é programador de cinema e profesional de festivais cinematográficos.
Estudou o máster en Estudos Cinematográficos, Programación e Curadoría da National Film and Television School do Reino Unido.
Actualmente, forma parte do equipo de programación do Festival de Cine Black Nights de Tallin, o Festival Internacional de Cine de Edimburgo e do Lago Film Fest, na localidade italiana de Revine Lago. Ademais, traballa como Coordinador do Mercado en Sheffield DocFest e como Responsable de Industria en Pordenone Docs Fest. Ao longo do ano, tamén colabora con outros festivais e mercados internacionais como o BFI London Film Festival e When East Meets West.
Eloy Domínguez Serén é un cineasta e docente galego. Os seus filmes foron programados en festivais como IDFA, Mar del Plata, Visions du Réel ou Clermont-Ferrand, así no Anthology Film Archives, o Centre Pompidou ou o Museo Reina Sofía.
A súa primeira longametraxe documental, No cow on the ice, estréase en Visions du Réel 2015. En 2017 participa na Berlinale Talents con Hamada – estreada en IDFA 2018 -, película seleccionada en numerosos festivais.
En 2020 filma Os corpos, e en 2022 estrea o seu primeiro filme de ficción, Rompente, que obtén a Biznaga de Prata á Mellor Curtametraxe de Ficción no Festival de Málaga e é candidata aos Premios Goya 2023. En 2024 roda a súa primeira longametraxe de ficción, Tralovento, actualmente en fase de posprodución.
Ademais do seu labor como cineasta, é docente na Facultade de Ciencias da Comunicación da Universidade de Santiago de Compostela.
XURADO DESCUBERTAS
María Juárez é a directora do festival Directed by Women Spain. Xestora cultural, programadora e coordinadora de produción en festivais de cine e eventos artísticos, traballou en Iberseries e Platino Industria, Alcine –Festival Internacional de Cine de Alcalá de Henares, Emergente! CineLab, MAFIZ– no Festival de Málaga, no Torino Film Lab e no Rizoma Festival.
É tamén a responsable loxística de Documenta Madrid e Animario, en Cineteca Madrid, e actual adxunta a dirección do Cluster Audiovisual de Madrid, ademais de ser membro da xunta directiva de Matriz-Red de Festivales de Cine de Madrid e da asociación cultural MYC-Mujeres y Cine.
Xavier Montoriol é un cineasta, crítico e tradutor nado en Barcelona. Graduado en Linguas e literaturas modernas (UB), tamén cursou un máster en Estudos comparativos de literatura, arte e pensamento (UPF) e un posgrao en Comisariado audiovisual (EQZE). Escribiu para medios como A Cuarta Parede, Otros Cines Europa, Outskirts, À pala de Walsh ou Muelle5, espazo do que é cofundador. A súa primeira curtametraxe, Cantarà l’alosa, foi estreada en Curtas Vila do Conde en 2024.
Elba Fernández dedícase tanto á composición musical como ao deseño gráfico para o ámbito audiovisual.
Creou dous proxectos musicais, Jane Joyd (2009 – 2014) e Mordem (2015), cos que editou varias referencias e discos e viaxou ofrecendo concertos en xiras e festivais nacionais importantes. A raíz desta faceta musical comeza a realizar música orixinal para cine e TV xunto co músico Xavi Font, coincidindo en proxectos como Hierro, Auga Seca, Ons, Donde acaba la memoria, Código: Emperador, Rapa ou Sica.
A súa faceta gráfica consiste en realizar key art e deseño gráfico para cine e series, ocupándose de traballos como cartelería, cabeceiras, deseño para desenvolvemento de proxectos, títulos ou logos para distintas produtoras nacionais.