Bueu, 15/04/2025 – O 15 de abril abre a convocatoria para a recepción de proxectos. A través desta convocatoria, seleccionaranse cinco curtametraxes que participarán neste programa formativo e que terá lugar do 15 ao 21 de outubro.
Un ano máis, a Illa de Ons acollerá ás persoas seleccionadas na III Residencia FICBUEU ofrecéndolles un ambiente e contorna natural óptima para creación e desenvolvemento dos seus proxectos.
O programa formativo combina titorías individuais, mesas de guión e formacións específicas, todas elas impartidas por recoñecidas profesionais do sector audiovisual. Esta estrutura busca, ademáis de fortalecer os proxectos, a adquisición de ferramentas e recursos que potencien unha perspectiva interdisciplinar do proceso de produción.
O obxectivo principal é crear un espazo de traballo dedicado ao tratamento integral dos proxectos de curtametraxe na súa etapa de desenvolvemento, acompañándoos e asesorándoos ao longo de todo o proceso.
As cinco persoas seleccionadas para a III Residencia FICBUEU, ademais de estar acreditadas para poder participar en todas as actividades da 18ª Edición do FICBUEU, recibirán un premio de 1.500 € co obxectivo de axudar a costear a fase de desenvolvemento do proxecto.
O FICBUEU aposta pola consolidación desta iniciativa, que se suma a unha ampla programación de actividades impulsadas polo equipo ao longo de todo o ano.
As obras poderán enviarse ata o 30 de maio. As bases completas da convocatoria poden consultarse aquí.
A actividade conta co apoio da Xunta de Galicia a través da Axencia Galega das Industrias Culturais e está financiada polo Ministerio de Cultura.
