Bueu, 24/01/2025 – O Festival Internacional de Cinema de Bueu ten aberta a convocatoria de recepción de curtametraxes ata o 20 de abril. Como cada ano, o FICBUEU acollerá unha exquisita selección de obras chegadas de todo o mundo.
Alén das proxeccións, o FICBUEU seguirá convidando ao público a participar en coloquios, encontros e actividades relacionadas coa sétima arte, entre as que destacará a programación das IV Xornadas Cinematográficas. Haberá tamén música, obradoiros ou unha nova edición da Ruta de tapas 5 Estrelas. A partir do 15 de setembro, volverá o MINIFIC e con el todo un programa de actividades para a cativada e os centros de ensino.
Presentamos a imaxe desta nova edición do festival, inspirada na temática que abordaremos a través da Sección Retrospectiva, o exilio e a imaxe. As proxeccións da Retrospectiva irán acompañadas da presentación e publicación do Caderno FICBUEU #6 “Imaxes do exilio / Exilios da imaxe”, elaborado polo investigador e docente José Manuel Mouriño que explorará a figura do exilio desde a súa dimensión visual.
A identidade visual da 18ª edición é unha pintura de Remedios Varo, tratada co uso da textura de mapa de calor e movemento, facendo alusión á deslocalización como motor creativo e estético.
