Bueu, 26/05/2026 – Unha sección consolidada dentro do festival que busca poñer en valor o traballo audiovisual desenvolvido nos centros educativos galegos e apoiar as novas xeracións de cineastas.
A Sección Escolas Galegas está dirixida a centros de ensino, facultades e escolas de formación audiovisual con sede en Galicia e contará un ano máis con tres categorías competitivas: Educación Especial, Infantil e Primaria; Educación Secundaria; e Facultades e Escolas de Cinema Galegas.
As bases da convocatoria e o formulario de inscrición das curtametraxes xa están dispoñibles na páxina web do festival, e pódese acceder premendo aquí. O prazo de inscrición permanecerá aberto ata o 30 de xuño de 2026.
Poderán participar todas aquelas obras audiovisuais realizadas durante os cursos 2024/2025 e 2025/2026 que non foran presentadas en edicións anteriores do certame. A temática das obras será libre. As curtametraxes realizadas por centros de Educación Especial, Infantil, Primaria e Secundaria poderán ter unha duración máxima de 20 minutos, mentres que as producións de Facultades e Escolas de Cinema poderán acadar os 30 minutos. Cada centro poderá presentar tantas obras como desexe.
As obras finalistas coñeceranse ao longo do mes de agosto e serán proxectadas no marco do FICBUEU 2026, que celebrará a súa 19ª edición do 4 ao 19 de setembro en Bueu.
Os traballos seleccionados optarán aos seguintes premios:
- Mellor Curtametraxe de Educación Especial, Infantil e Primaria: trofeo e formación audiovisual.
- Mellor Curtametraxe de Educación Secundaria: trofeo e formación audiovisual.
- Mellor Curtametraxe de Facultades e Escolas de Cinema Galegas: trofeo e formación audiovisual.
O xurado valorará especialmente a participación activa do alumnado en todas as fases do proceso creativo, así como a orixinalidade das propostas e o uso da linguaxe audiovisual. As curtametraxes gañadoras daranse a coñecer durante a Gala Escolas Galegas FICBUEU 2026, que terá lugar o 19 de setembro dentro da programación do festival.
