Bueu, 21/11/2025 – O Festival Internacional de Cinema de Bueu (FICBUEU) publicou na súa canle oficial de YouTube o documental A Roiba, un refuxio en Beluso, dirixido por Jaime Olmedo. A curtametraxe afonda na historia e no significado desta singular construción deseñada polo arquitecto Ramón Vázquez Molezún en 1967 sobre as ruínas dunha antiga fábrica de salazón no Concello de Bueu.
O filme amosa como, neste refuxio familiar de verán, Molezún combinou o seu dominio da arquitectura moderna cunha faceta máis artesanal, dando lugar a unha das súas obras máis emblemáticas e a unha peza chave da arquitectura do século XX.
Con esta publicación, o FICBUEU reafirma o seu compromiso coa curtametraxe e coa divulgación cultural e acceso aberto aos seus contidos. O documental permanecerá dispoñible de forma permanente na Canle FICBUEU, enriquecendo o seu repositorio audiovisual co obxectivo de promover a súa consulta e divulgación.
Este proxecto contou co apoio da Deputación de Pontevedra a través das axudas a publicacións para Patrimonio Documental e Bibliográfico.
