Bueu, 12/08/2025 – Un ano máis, dentro da programación do festival, que se celebrará entre o 5 e o 20 de setembro, organizamos as Xornadas Cinematográficas, un espazo dedicado á reflexión sobre a arte cinematográfica e as disciplinas que a rodean. Nesta 18ª edición do FICBUEU as xornadas estarán dedicadas á relación entre música e cinema, baixo o título: Música e cinema. A composición como elemento narrativo. As actividades terán lugar o sábado 6 de setembro, e contaremos con profesionais de prestixio que abordarán diferentes perspectivas, análise e experiencias arredor da composición musical no ámbito audiovisual.
Visitarán Bueu profesionais como Ana Pfaff e Ernest Pipó para falar sobre a música e a montaxe en Romería, de Carla Simón; e outros como Ana Morote, Gustavo Gill, Iván M. Lacámara, Mara Villavicencio, Alberto Torres e Gabi Martínez abordarán a creación das bandas sonoras e o emprego da música na creación audiovisual.
O público poderá coñecer da man do crítico de cinema Diego Salgado os nomes das compositoras que fixeron grandes aportes á historia da composición cinematográfica, mentres que o especialista en música de cine Conrado Xalabarder analizará a importancia do son e da música no cinema de David Lynch.
Encontros profesionais
Para continuar afondando na composición como elemento narrativo, levaranse a cabo uns Diálogos sobre a composición en colaboración con Musimagen (Asociación de Compositorxs de Música para el Audiovisual). Esta actividade consistirá en tres mesas nas que compositoras e compositores de bandas sonoras conversarán por parellas sobre cuestións relacionadas con coa composición musical para o audiovisual, combinando un perfil experimentado cun perfil máis novel.
Os seus protagonistas serán Alicia Morote e Gustavo Gill para falar sobre como comezar a compoñer e os procesos da creación da canción dentro do cine; Iván M. Lacámara e Mara Villavicencio, que se centrarán no aspecto máis tecnolóxico, sintetizadores e hibridación sonora; e Alberto Torres e Gabi Martínez, que aboradarán o deseño sonoro e o guión musical.
As compositoras de bandas sonoras
Como outra das actividades destas Xornadas Cinematográficas, o crítico de cinema e divulgador de cómic e cultura popular Diego Salgado impartirá unha clase maxistral na que propoñerá unha viaxe polos aportes das compositoras á historia da música de cine. Doreen Carwithen, Shirley Walker, Rachel Portman, Hildur Guðnadóttir e Mica Levi serán algunhas das compositoras protagonistas desta ponencia onde poderemos descubrir os aportes das mulleres á historia da música no cine.
A palestra non só se centrará nas figuras máis recoñecidas, senón que atenderá tamén ás autoras de culto e ás circunstancias de produción cultural e recepción social que condicionaron a presenza dunhas e doutras.
A música e a montaxe en Romería
Tal e como xa adiantamos, unha das actividades destas xornadas porá o foco sobre A música e a montaxe en Romería, que será o filme inaugural desta 18º edición do festival. Será nun encontro no que Ana Pffaf (montadora) e Ernest Pipó (compositor) reflexionarán sobre os procesos de traballo conxunto no filme de Carla Simón, nunha sesión moderada por Gaspar Broullón e na que se dialogará co público sobre a importancia das sinerxías entre ambas disciplinas.
David Lynch visto cos ouvidos
As Xornadas Cinematográficas do FICBUEU acollerán tamén a actividade Análise fílmica. David Lynch visto cos ouvidos, na que o especialista en música de cine Conrado Xalabarder analizará a importancia do son e da música no cinema do director. Lynch fixo uso tanto do son como da música con finalidades artísticas, para completar os seus filmes e convertelos nunha experiencia única. Tomando isto como referencia, comentaranse globalmente algúns dos seus filmes máis representativos e particularmente algunhas escenas, procedentes de clásicos lynchianos como The Elephant Man (1980), Blue Velvet (1986), Twin Peaks (1990) ou Mulholland Drive (2001), entre outras. O encontro pecharase coa proxección de The Grandmother (1970), unha das primeiras curtas dirixidas polo cineasta.
Estas actividades son abertas ao público e de balde.
Programa Sábado 6. Xornadas cinematográficas:
- 11:00 H Encontros profesionais. Diálogos sobre a composición
- 16:30 H Clase maxistral. Do clasicismo á modernidade: as compositoras de bandas sonoras
- 18:30 H Conversa. A música e a montaxe en Romería
- 20:30 H Análise fílmica. David Lynch visto cos ouvidos
