Bueu, 23 de xullo do 2026 – O festival, que se celebrará do 4 ao 19 de setembro, dedica a súa retrospectiva e o novo Caderno FICBUEU a analizar como o formato curto foi clave na evolución dun dos xéneros máis influíntes da historia do cinema
A ciencia ficción será un dos grandes eixos temáticos da XIX edición do Festival Internacional de Cinema de Bueu (FICBUEU), que se celebrará do 4 ao 19 de setembro. O certame dedicará a súa tradicional retrospectiva a percorrer máis de 130 anos de historia do xénero a través da curtametraxe, unha viaxe que se completa coa publicación dun novo volume da colección Cadernos FICBUEU, asinado pola investigadora e cineasta Irene de Lucas Ramón.
Baixo este enfoque, o festival reivindica o papel esencial da curtametraxe na construción da ciencia ficción como linguaxe cinematográfica. Lonxe de ser un formato secundario, os filmes curtos converteron o xénero nun espazo de experimentación onde, desde os primeiros anos do cinema ata a actualidade, cineastas de distintas épocas puxeron a proba novas formas de representar o futuro, imaxinar outros mundos e explorar os límites da narrativa e da creación visual.
A retrospectiva reunirá unha selección de obras fundamentais que percorren distintas décadas e estilos, desde os pioneiros do cinema como Georges Méliès, Alice Guy ou Segundo de Chomón ata autores e autoras contemporáneas como Chris Marker, Guy Maddin, Coralie Fargeat, Chema García Ibarra ou Jérémy Clapin. O programa permitirá descubrir fitos da historia do xénero como o primeiro robot do cinema, a primeira curtametraxe española de ciencia ficción, viaxes espaciais, distopías, invasións alieníxenas, futuros alternativos ou reflexións sobre a memoria e a tecnoloxía. Tamén se evidenciaría a capacidade da ciencia ficción para dialogar con outros rexistros como a comedia, o surrealismo, o musical ou o cinema experimental.
Novo Caderno FICBUEU a cargo de Irene de Lucas Ramón
Como complemento á programación, o festival publicará un novo título da colección Cadernos FICBUEU, dedicado a afondar na relación entre a ciencia ficción e a curtametraxe. A publicación propón un percorrido polos códigos que definiron o xénero desde os seus inicios e analiza como o formato curto contribuíu decisivamente á súa evolución, establecendo conexións entre distintas épocas, autores e formas de entender a imaxinación cinematográfica.
A autora do volume é Irene de Lucas Ramón, doutora en Comunicación Audiovisual pola Universidade de Valencia, investigadora especializada no cinema dos primeiros tempos e nas figuras pioneiras da historia cinematográfica. Autora de libros como Alice Guy en el origen del cine ou Helena Cortesina. Una cineasta pionera en España, compaxina o labor investigador coa dirección e guión de curtametraxes premiadas en festivais nacionais e internacionais, ademais dunha intensa actividade como programadora, relatora e colaboradora en publicacións especializadas.
Con esta retrospectiva e o novo Caderno, o FICBUEU propón unha mirada ampla sobre un dos xéneros máis fértiles da historia do cinema e reivindica a curtametraxe como un territorio privilexiado para a innovación, a experimentación e a capacidade de anticipar o futuro. Unha proposta que reforza a vocación do festival por ofrecer ao público ferramentas para descubrir, contextualizar e reflexionar sobre o cinema máis alá das proxeccións.
A publicación deste volume dá continuidade á colección Cadernos FICBUEU, unha serie de publicacións anuais coa que o festival contribúe á bibliografía e á historiografía cinematográficas desde a perspectiva da curtametraxe. O anterior título da colección, O destino como forma. Imaxes do exilio / exilios da imaxe, de José Manuel Mouriño, continuou ao longo do último ano o seu percorrido por diferentes institucións culturais e académicas, con presentacións na Filmoteca de Galicia, o Goethe-Institut Madrid, o Lenfest Center for the Arts, o Instituto Cervantes de Nova York, a Filmoteca de Andalucía ou a Facultade de Filosofía da Universidade Complutense de Madrid. Unha traxectoria que evidencia a proxección da colección máis alá do festival e reforza o compromiso do FICBUEU coa investigación, a divulgación e o pensamento arredor do cinema.
A edición deste caderno lévase a cabo coa colaboración da Consellería de Cultura, Lingua e Xuventude a través da Secretaría Xeral da Lingua.
