Bueu, 10/07/2026 – A piques de presentar a súa 19ª edición, o FICBUEU fai balance dunha tempada marcada por unha intensa actividade, cunha ampla programación e múltiples colaboracións con eventos culturais e festivais nacionais e internacionais.
Ao longo de todo o ano, o festival traballou na visibilización da curtametraxe e no reforzo da súa presenza no panorama cinematográfico internacional, ampliando a súa rede de colaboracións e promovendo o intercambio cultural e a difusión do cinema en formato curto.
O ano comezou coa celebración en Bueu, por terceiro ano consecutivo, dunha nova sesión de Shortcutz Amsterdam, un circuíto internacional que conecta audiencias de todo o mundo para outorgar o Premio do Público Internacional deste festival neerlandés. Máis información aquí.
No mesmo mes de xaneiro, o FICBUEU participou nas xornadas Unha cuestión de perspectiva. As mulleres no audiovisual galego, organizadas polo Concello de Pontevedra no marco da programación cultural previa aos Premios Feroz. A responsable de comunicación do festival, Lucía Rodríguez, formou parte da mesa redonda Os circuítos do cinema galego, na que se abordaron cuestións como a perspectiva de xénero nos festivais, a oferta cinematográfica nas salas e outros espazos de exhibición, divulgación e consumo audiovisual.
No mes de abril celebrouse unha nova edición de Noite de Festivais, unha iniciativa consolidada xa como un espazo de encontro entre certames internacionais e o público galego arredor do cinema breve. A proposta reúne nunha sesión especial curtametraxes seleccionadas por festivais convidados de distintos países, ofrecendo ao público a posibilidade de descubrir pezas dificilmente accesibles nos circuítos habituais. Máis información aquí.
Foi precisamente en abril cando o FICBUEU iniciou en Marsella (Francia) o desenvolvemento do proxecto europeo EIYEI, Youth Empowerment Initiative, impulsado no marco do programa Erasmus+ xunto con entidades de Francia, Italia e Grecia.
A iniciativa busca favorecer a inclusión social e profesional da mocidade en situación de vulnerabilidade a través da cultura, o cinema e as novas tecnoloxías inmersivas. O proxecto articúlase arredor da creación dun hub dixital concebido como un espazo de formación, experimentación e produción audiovisual, no que as persoas participantes poderán adquirir competencias técnicas e transversais vinculadas ás profesións do futuro.
Ademais, EIYEI proporcionará recursos pedagóxicos ao profesorado e aos axentes socioeducativos para reforzar o acompañamento da mocidade en situación de exclusión ou abandono escolar. O proxecto desenvolverase durante os próximos dous anos, período no que os catro socios manterán encontros de traballo nos distintos países participantes.
A actividade internacional do festival continuou en maio coa participación de María Ruiz-Falcó, codirectora do FICBUEU, nos Encontros Profesionais organizados polo Festival de Cinema de Viana do Castelo (Portugal), dentro do Foro Cinema e Escola. Ruiz-Falcó participou na terceira mesa redonda do encontro, centrada nas prácticas pedagóxicas en Portugal e Galicia, e presentou o proxecto educativo que desenvolve o FICBUEU. Nesta xornada abordáronse tamén cuestións relacionadas coa conexión entre a industria audiovisual e o cinema destinado á infancia e á mocidade, coa vontade de reforzar os vínculos entre proxectos de educación cinematográfica, profesorado e axentes culturais.
Neste mes de xullo, María Ruiz-Falcó regresa a Portugal convidada pola 34ª edición do Curtas Vila do Conde – International Film festival, un dos festivais de curtametraxes máis relevantes do panorama internacional.
A presenza do FICBUEU no exterior completouse coa participación no Adriatic Film Festival (Italia), onde María Ruiz-Falcó presentou o proxecto do festival no marco do programa profesional Coproduction Forum. Ademais, o festival tivo a oportunidade de programar dentro da sección Fuori Concorso, Aunque es de noche, de Guillermo García López, gañadora do Premio á Mellor Curtametraxe Española da 17ª edición do FICBUEU.
Xunto a estas colaboracións internacionais, o festival continuou reforzando o seu compromiso social a través da participación en diferentes iniciativas e programacións desenvolvidas en colaboración con colectivos como Ambienta, o Cineclube Entre Cortiñas ou a organización Polari. Máis información sobre estas actividades aquí.
Todas estas experiencias contribúen a fortalecer alianzas, abrir novas vías de cooperación e seguir enriquecendo un proxecto cinematográfico, cultural e social que medra edición tras edición.
Como broche a un ano especialmente intenso, o FICBUEU recibiu un importante recoñecemento por parte da Academia de Cine ao ser incorporado á listaxe oficial de festivais cualificadores para os Premios Goya nas categorías de Mellor Curtametraxe de Ficción, Mellor Curtametraxe Documental e Mellor Curtametraxe de Animación.
A inclusión do certame nesta relación supón un paso adiante na súa traxectoria e un aval da súa aposta constante pola excelencia na programación e pola promoción do formato curto ao longo das súas dezaoito edicións. Este recoñecemento reforza a posición do FICBUEU como unha cita de referencia para cineastas, produtoras e profesionais do sector audiovisual.
Agardámosvos na 19ª edición do festival, que terá lugar do 4 ao 19 de setembro!
