Bueu, 22/05/2026 – O vindeiro venres, 29 de maio, o Festival Internacional de Cinema de Bueu volverá colaborar con AMBIENTA, a Mostra de Cinema LGTBIQ+ de Pontevedra. O FICBUEU farase cargo, un ano máis, da sesión de peche da mostra coa programación de Ambienta en Curta, unha selección de curtametraxes que, desde unha ollada crítica e diversa, denuncia as desigualdades e problemáticas que afectan o colectivo LGTBIQ+ Un crisol de puntos de vista que dá conta da pluralidade existente dentro do propio colectivo.
AMBIENTA nace para visibilizar a mellor produción audiovisual, galega e internacional, sobre a realidade LGBTIQA+. É unha mostra que reivindica un cinema de calidade que recolla as vidas, os corpos e os afectos de todas as persoas, sen excepción, ao tempo que constrúe un espazo de encontro, cultura e socialización arredor do cinema e da diversidade.
Este ano programamos para esta sesión os seguintes filmes:
ALGO NOVO QUE CONTAR, Paula Pereira
(Galicia, 2025, 20 min. VO)
Xoana pasa o verán cunhas amigas. Entre elas está Emma, unha rapaza coa que comeza a explorar algo máis ca unha amizade. Porén, Xoana nunca tivo relacións sexuais e a idea de dar ese paso xéralle medo e inseguridade.
HELLO STRANGER (Ola, descoñecide), Amélie Hardy
(Canadá, 2024, 16 min. VOSG)
Cooper Josephine loita co seu proceso de transición. Na procura da súa identidade, enfróntase ás expectativas familiares e aos prexuízos sociais nun camiño cara a si mesma.
BLOOMER (O espertar), Jimmy Zwedberg
(Suecia, 2025, 13 min. VOSG)
Pascal filma unha banda xuvenil nun skatepark e, pouco a pouco, nace unha atracción mutua entre el e Joel. Mais a situación complícase cando Pascal descobre que Joel ten só dezaseis anos.
O FICBUEU leva anos colaborando activamente con colectivos e iniciativas que promoven a igualdade. Desde a Asociación FICBUEU contribuímos tamén a este labor a través de decisións como a de formar un equipo integrado maioritariamente por mulleres. Ademais, empregamos unha linguaxe inclusiva e non discriminatoria en todas as nosas comunicacións e desenvolvemos actividades específicas que poñen estes valores no centro da programación.
Dentro desta liña de traballo, o pasado mes de marzo o FICBUEU programou, en colaboración co Cineclube Entrecortiñas, unha sesión especial para conmemorar o Día Internacional da Muller Traballadora no auditorio da Illa de Arousa. A sesión reuniu cinco curtametraxes dirixidas por mulleres de diferentes partes do mundo: Rose, de Annika Mayer; Rapaza de fábrica, de Selma Cervantes; Anansi, de Aude N’Guessan Forget; Vlekkeloos, de Emma Branderhorst; e Shadows, de Rand Beiruty.
Cinco miradas, cinco historias e unha mesma forza: a creatividade e a resistencia das mulleres a través do cinema.
Ademais, o festival prepara tamén unha nova colaboración con POLARI, organización comprometida coa igualdade e coa preservación dos dereitos individuais e colectivos na Illa de Arousa. O Día do Orgullo LGTBIQA+, o 28 de xuño, celebrarase cunha sesión especial de curtametraxes no Auditorio da Illa de Arousa ás 20:30 h.
