Bueu, 14/09/2025 – O FICBUEU anunciou o Palmarés da súa 18ª edición nunha entrega de premios que estivo amenizada pola música en directo de André Soaxe e Martiño Malleiro Díaz.
O Xurado Oficial, de carácter internacional e encargado de entregar o Primeiro Premio, o Premio á Mellor Curtametraxe Galega e o Premio á Mellor Curtametraxe Española estivo formado pola productora e xestora cultural Beatriz Hernández, o cineasta e docente Eloy Domínguez Serén e o programador Massimo Ianetti.
As Xurado Descubertas compúxose pola xestora cultural e programadora María Juárez, a compositora musical e deseñadora Elba Fernández e o cineasta, crítico e tradutor Xavier Montoriol. Os tres escolleron o premio á Mellor Curtametraxe Descubertas, á Mellor Curtametraxe de GZ_00 e á Mellor Curtametraxe de Escolas de Cinema Internacionais.
As películas premiadas e as xustificacións dos xurados son as seguintes:
> Primeiro premio: THE EGGREGORES’ THEORY de ANDREA GATOPOULOS.
Unha obra que absorbe pola súa ousada orixinalidade e impresionante resonancia, dando forma a un universo de visións espectrais e monstruosas onde as palabras adquiren un peso perigoso. Un filme que explora unha nova tecnoloxía para un novo tipo de imaxe.
Nesta categoría, o xurado decidiu concederlle unha mención especial a PERCEBES, DE ALEXANDRA RAMIRES E LAURA GONÇALVES. Unha reflexión poética e conmovedora entre o artístico e o comunitario, que realiza un vívido retrato documental en acuarela.
> Premio mellor curtametraxe galega: ABELLÓN de FON CORTIZO.
Unha obra sobre sentidos, sensacións e sentimentos. Que ten a capacidade de incorporar a audiodescripción como elemento narrativo, sumerxindo ao espectador nunha relación innovadora coas imaxes. Un filme que comparte unha experiencia visual a través dunha percepción non visual, accesible a todo o público.
> Premio mellor curtametraxe española: CAMPOLIVAR de ALICIA MONCHOLÍ.
A directora realiza unha viaxe incómoda que fuxe da nostalxia a través da utilización simbólica dun espazo familiar e cinematográfico. Esta obra abre unha xanela a un episodio doloroso da infancia.
Unha película honesta, íntima e valente que fragmenta a realidade entre arquivos legais e xogos infantís.
> Premio do público: O, de RÚNAR RÚNARSSON
> Premio á mellor curtametraxe Descubertas: ON HOLD de DELIA HESS.
Pola súa forma de condensar nunha imaxe poética unha situación cotiá de espera e mergullarnos con sinxeleza nun ritmo propio.
> Premio á mellor curtametraxe GZ_00: ALGO NOVO QUE CONTAR de PAULA PEREIRA.
Por facer da escoita unha ferramenta narrativa que potencia o relato e por xerar unha intimidade coa forma de filmar os seus personaxes.
> Premio á mellor curtametraxe de Escolas de Cinema Internacionais: CROW MAN de YOHANN ABDELNOUR.
Pola complexidade das emocións que reflicte nun curto espazo de tempo, encapsulando negación, rabia, tristeza e aceptación a través dun trato tenso e cunha forma delicada.
> Premio á mellor curtametraxe de Escolas de Cinema Galegas: PRAZA DO PUNTO de AIRA PORTOS REY.
Pola súa exquisita proposta estética e polo orixinal uso da montaxe que dan como resultado unha peza documental innovadora.
