Bueu, 20 de outubro de 2026- Durante sete días, as e os cineastas dos catro proxectos seleccionados traballaron as súas curtametraxes coa titorización de Belén Funes e formacións con profesionais de referencia do sector.
A cuarta edición da Residencia FICBUEU despediuse onte da Illa de Ons, onde seis cineastas desenvolveron, do 13 ao 19 de outubro, os catro proxectos de curtametraxe seleccionados. A residencia, concibida para acompañar o desenvolvemento integral das curtas, ofreceulles unha semana de inmersión creativa nun enclave natural único, coas condicións idóneas para pensar as súas películas.
Ao longo da semana, o grupo compartiu un espazo de traballo e reflexión no que abordou todo o proceso de creación das súas obras, acompañado por un equipo de profesionais de prestixio do audiovisual.
A guionista e cineasta Belén Funes foi a titora desta edición e acompañou as persoas participantes durante toda a residencia. A súa implicación resultou fundamental para que cada cineasta puidese afondar nas súas historias e nos seus personaxes. O traballo combinou titorías individuais con mesas de guión colectivas, que enriqueceron os proxectos con puntos de vista diversos.
Funes fixo un balance moi positivo da experiencia: «Foi unha experiencia superpositiva, cun tempo de tranquilidade e acougo para pensar nas películas, algo que é moi difícil de conseguir. Todos teñen plans na cabeza para sacalas adiante e que vexan a luz». E engadiu: «Saen todos coas enerxías moi renovadas e con moitas ganas de facer as súas películas, as que están escribindo. Isto é o máis importante».
Ademais das titorías, as e os residentes seguiron formacións específicas sobre distintos ámbitos da creación audiovisual: a produción, con Silvia Fuentes e Anxos Fazáns; a coordinación de intimidade, con Lucía Delgado; e a dirección de casting, con Noemi Chantada. As catro profesionais compartiron a súa experiencia e a súa visión en clases maxistrais grupais e dedicaron tempo ao traballo individual con cada proxecto, o que deu aínda máis riqueza ao diálogo arredor do proceso cinematográfico.
Ons volveu ser o escenario perfecto para parar, pensar e crear. A Asociación FICBUEU agradece o talento, a xenerosidade e o entusiasmo de todas as persoas participantes, e agarda seguir acompañando en vindeiras edicións a novas creadoras e creadores nos seus camiños cinematográficos.



