FESTIVAL INTERNACIONAL DE CURTAMETRAXES DE BUEU | FICBUEU

CARLOS REVIRIEGO
Escritor, docente e programador cinematográfico.

Entre 1999 e 2016 coordinou a sección de cine de El Cultural (El Mundo) e foi redactor xefe de Cahiers du cinéma-España nos anos da súa fundación, formando parte actualmente do Consello de Redacción de Caimán Cuadernos de Cine

Como docente imparte clases de Estética do Cine Contemporáneo e de Crítica Cinematográfica en diferentes centros universitarios e academias audiovisuais: ECAM, UAV, UCM, Universitat Blanquerna, etc. Durante tres anos foi director artístico da Área de Cine e coordinador dos Másters na Escola Universitaria TAI (Madrid).

Compaxinando a súa carreira coa escritura publicou Elogio de la distancia. Dos miradas a un territorio no 2009 e ten colaborado en numerosos libros colectivos como Los poetas del cine, Cine español para un nuevo siglo. La mirada contemporánea, Nouvelle Vague. Los caminos de la modernidad, etc. 

No eido da programación ten formado parte do equipo de selección do Festival Mapfre 4+1 e de DocumentaMadrid. Actualmente é membro do Comité de Programación do Festival de Cine Alemán de Madrid e dende 2017 traballa como director adxunto e de programación da Filmoteca Española.

CAROLINA ASTUDILLO
Cineasta e docente. 

Diplomada en Estudos de Cinema pola Universidade Católica de Chile, realiza o Mestrado en Documental Creativo na Universitat Autònoma de Barcelona. O seu traballo en investigación e creación ten como eixo articulador a muller e a memoria histórica, oscilando as súas pezas audiovisuais entre o cinema experimental e o documental. 

Coas súas primeiras longametraxes, El gran vuelo (2014) e Ainhoa, ya no soy esa (2018) acadou numerosos galardóns como a Biznaga de Prata no Festival de Málaga de 2015 e 2018, o premio Feroz ao mellor documental, mellor mediometraxe documental en Alcances ou a mención especial do xurado de Documenta Madrid de 2018.

O seu traballo en formato curtametraxe, De monstruos y faldas (2008), Lo indecible (2012) y El deseo de la civilización: Notas para El gran vuelo (2014) e Un paseo por New York Harbor (2019) foi tamén premiado e exhibido en certames e mostras nacionais e internacionais. 

No ámbito docente imparte cursos, seminarios e palestras na Universidade Autónoma de Barcelona, Universidad Pompeu Fabra, Universidad de Santiago (Chile), Universidad Pontificia Bolivariana (Colombia), Universidad Chileno-Británica de Cultura (Chile) e nas escolas de cine ESCAC, ECIB, Master Lav, La Casa del Cine e LENS (España).

CARLO SIRONI
Director de cinema.

Sironi comezou a súa traxectoria no ámbito do cinema dentro do equipo de fotografía para despois iniciarse na dirección. 

Coas súas curtametraxes Sofía, Cargo, Il Filo di Arianna e Valparaiso obtivo múltiples recoñecementos nos principais festivais de cinema do mundo como o Festival de Venecia, Locarno Film Festival, Torino Film Festival, etc. 

Ao mesmo tempo os seus proxectos teñen sido seleccionados para participar en numerosos obradoiros de desenvolvemento como a Residence of the Cannes Cinefondation, Sundance Lab, Torino Film Lab ou a Script Station da Berlinale.

Coa súa primeira longametraxe Sole, que trata o tema da xestación subrogada con especial delicadeza, competiu na sección Orizzonti do Festival de Venecia, na Sección Discovery do Toronto International Film Festival, foi nominada como mellor longametraxe ao premio David de Donatello e gañaou o premio European Discovery nos European Film Awards, entre outros.