XURADOS INTERNACIONAL / NACIONAL / EXPERIMENTAL -

XURADO INTERNACIONAL

Alejo  Flah

Alejo Flah guionizou e dirixiu os filmes Taxi a Gibraltar, cun elenco encabezado por Dani Rovira, e Sexo fácil, películas tristes, protagonizada por Ernesto Alterio, Quim Gutiérrez e Marta  Etura. Tamén escribiu os guións da miniserie Vientos de Agua ou das películas Séptimo e La adopción. Ademais, ten impartido formacións en escolas de cinema de España, Cuba e Arxentina. Nestes intres, atópase preparando a súa terceira película.

Antoine Lopez

O arxelino Antoine Lopez realizou estudos científicos e de historia da arte en Francia, onde en 1979 acabaría sendo membro fundador do Festival de Curtametraxes de Clermont-Ferrand, o maior evento dedicado ás curtas a nivel mundial, que coorganizou ata 2013. Dirixiu pezas cinematográficas moi variadas, como Rodolfo Traviata, le film; Lieux  communs ou Traverses, seleccionada en máis de corenta festivais. Como cartelista, traballa canda Isabelle Pio baixo o pseudónimo Bologo e, ademais, ofrece conferencias como especialista en animación.

Sara  Mansanet

Sara Mansanet é a responsable da aula de Cinema da Universitat de València e directora do Festival Internacional de Mediometrajes La Cabina, un dos dous únicos certames europeos dedicados a filmes de entre 30 e 60 minutos. Licenciada en Historia da Arte, en Cinema Jove iniciouse na produción audiovisual e, mais recentemente, traballou na longametraxe La Banda ou na curta La buena fe. Como especialista en cine, colabora entre outras coa radio pública valenciana e é produtora asociada da serie de televisión documental Terres de Cinema.


XURADO NACIONAL

Andrés Goteira

Despois de ter realizado varias curtas, Andrés Goteira escribe e dirixe Dhogs, o seu debut na longametraxe co que percorreu numerosos certames por todo o mundo. Trátase do primeiro filme rodado en galego que se estreou no Festival de Sitges e gañou 13 das 17 candidaturas ás que optaba nos Premios Mestre Mateo 2017. Na actualidade, o tamén fundador da produtora Gaitafilmes traballa na preprodución dun documental íntimo, Welcome to ma maison, e no guión da súa segunda película de ficción, A pequena variación.

María Vázquez

María Vázquez é un rostro moi recoñecible do eido televisivo por ter participado en series como Vivir sin permisoFariña ou Padre Casares, mentres que no cinema traballou con grandes directores como Armendáriz en Silencio Roto ou Bollaín en Mataharis, filme polo que foi nomeada aos Goya e polo que obtivo diversos galardóns. O seu traballo tamén foi premiado en distintas edicións dos Mestre Mateo, onde resultou galardoada como Mellor Actriz polos seus papeis en O club da calcetaMar libre e Trote.  Vén de estrear Quien a hierro mata.

Xúlio Abonjo

Xúlio Abonjo iniciou a súa carreira profesional no teatro como actor e mesmo escribindo e dirixindo Hendaya mon amour, galardoada nos María Casares. O seu primeiro traballo ante as cámaras foi en 1998 na curta A escapada e continuaría en diversas series da TVG coma Terra de Miranda,  A vida por diante e Serramoura, amais de producións de ámbito estatal como Cuestión de sexo ou Fariña. No cinema participou nas curtametraxes Sen chumbo ou Einstein-Rosen, polas que recibiu distintos premios, e longas como O lápis do carpinteiroO ano da carracha, Encallados ou Os fenómenos.


XURADO EXPERIMENTAL

  Pela del Álamo

Licenciado en Comunicación Audiovisual e Máster en Documental de Creación na Universitat Pompeu Fabra, desde 2001 Pela del Álamo traballa en publicidade, televisión e cinema. En 2005 crea delÁlamo estudio, onde combina a actividade profesional con proxectos persoais. Dirixiu e produciu os documentais A cuarta pista e N-VI, que recibiu numerosos galardóns. En 2013 convértese en director artístico do festival Curtocircuíto (Santiago de Compostela) e tamén é programador de curtametraxes en La Ola (Los Ángeles). Agora traballa na súa próxima longametraxe, Montaña ou morte.

Jaione Camborda

Tras rematar os seus estudos cinematográficos en Praga e Múnich, Jaione Camborda funda en Galicia a produtora Esnatu Zinema. Nela realiza un recoñecido labor dirixindo pezas rodadas con material fílmico de corte experimental, como Proba de axilidade, Nimbos, Lilit ou Rapa das bestas. A realizadora decántase polo formato Super 8, desde a confianza na imaxe, a materialidade e o gran lírico. A partir do etnográfico, o seu traballo reflexiona sobre a relación da persoa co animal, a violencia e o atávico. Dirixiu a longametraxe Arima, amais de exercer como guionista e directora de arte en numerosos filmes.

Suso Novás

Programador cultural, desde mediados dos 90 Suso Novás formou parte do lendario Cineclube Pontevedra e deseñou o Cine Fórum do programa municipal Noites Abertas. Foi docente na facultade de Belas Artes da Universidade de Vigo e na UNED. Entre 2004 e 2010 colaborou regularmente con Artnotes, revista internacional de arte. Desde 2007 programa e coordina os seminarios e ciclos cinematográficos da Vicerreitoría do Campus de Pontevedra. Na actualidade traballa nas áreas de programación e coordinación formativa do festival Novos Cinemas (Pontevedra).


XURADO ESCOLAS

Eloy Táboas

Eloy Táboas comezou no mundo do son gravando maquetas de grupos locais. Logo formouse como técnico superior en son, para despois especializarse no eido audiovisual, tanto na Escuela Internacional de Cine y TV de Cuba como con distintos mestrados. En 2012 traballou no estudo de dobraxe Babalúvox e na produtora Samthing Visual. É socio de Azo Audiovisual e, como profesional autónomo, participou en longametraxes, series, publicidade, documentais, programas televisivos, dobraxe e curtas, traballando como director de son directo, microfonista ou postprodutor de son.

Alba Ferradás

A bueuesa Alba Ferradás sempre manifestou unha gran paixón polo mundo do cinema. Desde moi pequena tivo unha cámara nas súas mans. Estudou Comunicación Audiovisual na Universidade de Vigo e actualmente cursa un Máster en Dirección de Arte Publicitaria na mesma universidade. Participou de forma activa na creación de varias curtametraxes, entre as que se atopan as premiadas La última pista (2º Premio Creación Uvigo) e Astral (1º Premio Creación Uvigo, Olloboi e Mellor Curtametraxe de Escolas e Facultades FICBUEU 2017).

Seso Durán

Músico, compositor e profesor de música, Seso Durán é especialista no emprego do audiovisual como recurso didáctico, tendo acadado múltiples premios co seu alumnado en distintos certames escolares de ámbito galego e estatal. Comprometido coa innovación educativa, é na actualidade vicepresidente da Confederación de Asociaciones de Educación Musical del Estado Español e regularmente convídano a compartir os seus proxectos e experiencias en destacados foros, así como a impartir formación audiovisual para o profesorado.