FESTIVAL INTERNACIONAL DE CURTAMETRAXES DE BUEU | FICBUEU

PABLO CACHEDA DE PAZ
Director e productor audiovisual.

Formado en imaxe e montaxe na Escola de Imaxe e Son de A Coruña, especialízase en captación de vídeo, posprodución e distribución. En 2013 crea a súa propia productora, Volvemos a primera, baixo a cal desenvolve proxectos de creación audiovisual e docencia. 

Ao longo da súa carrerira, alén de realizar traballos en diferentes produtoras galegas como Voz Audiovisual, Pórtico, Alén Filmes, Ézaro Producciones ou Zircocine, dirixe varias curtametraxes, leva a cabo a webserie Clases de lo social e iníciase no mundo da dirección documental sendo O rural de todas (2020) o seu último traballo nese senso. De xeito paralelo, imparte obradorios formativos en colaboración con distintas institucións, chegando a formar parte do corpo docente do Estudo Bonobo e desenvolvendo o programa Pontevedra rodando dende 2017 ata a actualidade. 

LARA ALONSO VÁZQUEZ
Artista multidisciplinar.

Graduada en Comunicación Audiovisual pola Universidade de Vigo en 2018, ao longo dos seus estudos dirixiu varias curtametraxes: Sueña, stopmotion de papel e Lume, vídeoarte para o proxecto Galifemia. 

Como traballo de fin de grao realizou o documental Onde estamos nós, a outra ollada do cinema  co que aborda a dirección de cinema dende unha perspectiva de xénero, e que foi estreado na Sección Curtas Galegas do festival Cineuropa de 2020. 

Ao longo da súa traxectoria ten colaborado con varios festivais de cinema de Galicia como o Galician Freaky Film Fest, o Primavera do Cine e o FICBUEU. 

SARA PENA COUTO
Docente.

Licenciada en Ciencias Políticas pola Universidade de Santiago de Compostela, posúe un mestrado en Dependencia e Servizos Sociais. Na Association Montessori Internationale en Praga e Londres cursou os estudos para converterse en especialista neste método nas etapas de infantil e terceira idade, respectivamente. 

Traballou como guía Montessori dende o 2014 en diversas escolas privadas de Praga e de Madrid e no 2016 desenvolveu o seu propio proxecto de pedagoxía, o espazo Rachachán. No 2019 incorporouse como docente de FP na rama de Servizos á Comunidade no CIFP A Xunqueira de Pontevedra.

Na mesma cidade, participa activamente dende a súa fundación en 2011 na Asociación Cultural Liceo Mutante, da que chegou a ser presidenta.