O Festival Internacional de Curtametraxes de Bueu puxo en marcha en 2016 unha Área Social desde a que contribuír ao desenvolvemento social e cultural da nosa contorna, fomentando valores coma o respecto, a igualdade e a solidariedade. A iniciativa foi medrando grazas ao apoio de CaixaBank, a través da Obra Social ”la Caixa”, e hoxe conta con varias liñas de actuación que permiten a diversos colectivos en situación de vulnerabilidade gozar dos efectos beneficiosos do cinema como ferramenta educativa e de cohesión social.

SESIÓNS DE CURTAS CON COLOQUIO

O equipo do FICBUEU desprázase unha vez ao mes a diferentes puntos da provincia para celebrar cinefórums en espazos aos que habitualmente non chega o cinema.  Tras proxectar unha escolma de curtametraxes que pasaron polo FICBUEU, adaptadas ás características e aos intereses das e dos destinatarios, debátese libremente sobre o tema en cuestión, contribuíndo así a estimular o pensamento crítico, a fomentar a aprendizaxe e a rachar coa rutina.

Centro penitenciario A Lama. A actividade busca mellorar a vida diaria das persoas internas, aproveitando a forza do audiovisual para derrubar muros e trasladarnos a diferentes lugares, coñecer outras culturas e abordar problemáticas sociais variadas. Destaca a selección de curtas cun ton positivo ou de comedia, partindo do cine como entretemento para profundar logo no coloquio. As e os asistentes dos diferentes módulos dunha das principais prisións de Galicia teñen a oportunidade de achegar o seu punto de vista e mesmo compartir experiencias, nun clima de respecto que pon en valor as opinións individuais pero tamén o traballo conxunto.

Centros de día para maiores. Persoas maiores usuarias dos centros de día Pescadoira e Contigo, en Bueu, asisten ás proxeccións, que cumpren cun dobre obxectivo. Dunha banda, contribuír á preservación da memoria e a capacidade de pensamento lóxico e, por outra, xerar un espazo de ocio novidoso, que favoreza as relacións interpersoais e a cohesión do grupo. Os fins terapéuticos mestúranse así cos de entretemento nunha actividade que, ademais, posibilita que moitas e moitos dos participantes non se despeguen definitivamente do cinema. Ao tempo, descúbrelles filmografías descoñecidas, máis alá da española e a norteamericana.

OBRADOIROS CINEMATOGRÁFICOS

Os colectivos que participan nos obradoiros de curtametraxes culminan as formacións semanais, que se imparten ao longo duns catro meses, realizando a súa propia obra cinematográfica. As e os asistentes pasan por todas as fases do proceso de creación, co apoio de profesionais que lles guían, e dispoñen de total liberdade para expresarse, polo que a curta resultante, que logo se estrea no FICBUEU, é da súa autoría ao cen por cen. Un traballo que ademais contribúe a visibilizar as súas potencialidades.

Centro penitenciario A Lama. Un grupo de internos asisten ao obradoiro, que lles permite deixar voar a imaxinación e impulsar a súa expresión artística. O resultado será un documental realizado polo equipo de reclusos, que se centrará na vida dun deles seleccionado mediante o casting realizado na prisión. Preténdese así darlle voz a un colectivo a miúdo silenciado e socialmente estigmatizado, que pode achegarnos unha nova visión da realidade.

Centro de Educación Especial de Panxón. O alumnado deste obradoiro está diagnosticado de trastorno grave da conduta e ten necesidades educativas especiais, pero iso non lle impide dar forma á súa propia curta. As monitoras da actividade, co apoio de persoal do centro, traballan con metodoloxías participativas e colaborativas, de xeito que se fomenta a integración cara o interno pero tamén cara o exterior, pois a curtametraxe resultante presentarase á comunidade.

Aspamsim. Mozas e mozos con discapacidade física ou intelectual constitúen o alumnado do obradoiro impartido no seo da Asociación de Pais e Nais de Persoas con Discapacidade do Morrazo. A través do cine, procúrase contribuír ao principal obxectivo da organización, que non é outro ca o de lograr a inclusión social dos seus familiares. Ao tempo, desenvólvense habilidades psicomotrices, creativas e comunicativas.

En anos anteriores, no marco da Área Social do FICBUEU financiada por ”la Caixa” téñense realizado actividades co centro da Asociación Juan XXIII en Cangas, a Asociación de Diagnosticadas de Cancro de Mama (Adicam), Fundación Secretariado Xitano en Vigo, Asociación con Eles en Vilagarcía, Xuntos Asociación Síndrome de Down en Pontevedra ou coa Unidade de Pediatría do Hospital Álvaro Cunqueiro. Ademais, en 2020 contou coa colaboración da Deputación de Pontevedra para traballar con adolescentes do centro Príncipe Felipe a través do cinema, organizando sesións de curtametraxes para debater sobre temas como alimentación saudable, sexualidade, violencia de xénero ou cambio climático.

Vídeo resumo da Área Social 2018/2019

Volver arriba