Sendo o compromiso social un dos piares fundamentais de todas as iniciativas da Asociación FICBUEU, no ano 2016 creamos a nosa propia Área Social, establecendo unha liña de traballo específica dirixida a colectivos desfavorecidos ou en risco de exclusión. O noso obxectivo é empregar o cinema como unha ferramenta terapéutica, de visibilización e integración, contribuíndo á cohesión e ao desenvolvemento social e cultural da nosa contorna. Así, promovemos valores como o respecto, a igualdade e a solidariedade.

Neste sentido, a través de dúas liñas de actuación, colaboramos nos últimos anos con diversas entidades de iniciativa social, como o Centro Príncipe Felipe, a Fundación Secretariado Xitano, a Fundación Igual Arte, ADICAM (Asociación de Diagnosticadas e Diagnosticados de Cáncer de Mama de Cangas), Xuntos Asociación Síndrome de Down, Asociación Juan XXIII, Asociación Con Eles, Fundación Menela ou a Asociación Érguete Vigo.

Tamén traballamos con administracións públicas como a Secretaría Xeral de Institucións Penitenciarias no Centro de A Lama, o Servizo Galego de Saúde no Hospital Álvaro Cunqueiro, a Consellería de Educación nos centros de educación especial CEE Vilagarcía e CEE Panxón (dirixidos a persoas con Trastorno Grave da Conduta) ou a Secretaría de Estado de Servizos Sociais no CPAP Bergondo (Centro de Promoción da Autonomía), entre outras.

Na maior parte destas actuacións realizáronse obradoiros de creación nos que as e os participantes desenvolveron integramente unha curtametraxe. Estas producións foron posteriormente estreadas no Festival Internacional de Cinema de Bueu, permitindo dar visibilidade ao seu traballo e reforzar o seu papel activo na comunidade.